اسلام آباد( پاکستان پوائنٹ نیوز04۔اگست۔2018ء ) پاکستان تحریک انصاف دے چیئرمین عمران خان دے گھر بنی گالا باہر میڈیا دے نمائندیاں نے سخت گرمی وچ صاف پانی تیکر نہ ملن اُتے احتجاجن ویڈیو بنا کے سوشل میڈیا اُتے اپ لوڈ کر دتی۔ ویڈیو وچ اک میڈیا نمائندے نے دسیا کہ سخت گرمی دے موسم وچ بنی گالا دے باہر سکیورٹی اہلکاراں دے نال نال کُجھ میڈیا دے نمائندے وی موجود نیں، سخت گرمی دی وجہ توں ایتھے موجود سبھ لوک پسینے نال بھجے تے تریہے(پیاسے) نیں۔ پر ساڈی پروہن چاری(مہمان نوازی) لئی ایتھے جس واٹر کولر دا انتظام کیتا گیا اے اوہدے وچ گندا پانی آ رہیا اے جو پین دے قابل نہیں اے۔ ویڈیو وچ میڈیا نمائندے نے اوس واٹر کولر توں پانی بھری بوتل وکھائی تے آکھیا کہ کیہ عمران خان ایس تبدیلی دی گل کر رہے نیں؟جے تبدیلی ایہو اے تے فیر آفرین آں ایس تبدیلی اُتے۔ میڈیا نمائندے نے آکھیا کہ اسیں عمران خان توں بینتی کرنے آں کہ کُجھ ہور نہ سہی پر ساڈے لئی گھٹو گھٹ پانی دا بندوبست کر دیو۔ ویڈیو سوشل میڈیا اُتے وائرل ہوندے ای ناقداں نے کپتان نوں تنقید دا نشانہ بنانا شروع کر دتا۔ ناقداں دا کہنا سی کہ عمران خان اپنے گھر دے باہر موجود سکیورٹی اہلکاراں تے میڈیادے نمائندیاں نوں پین لئی صاف پانی تیکر نہیں دے سکے، ایس طرحاں عمران خان ملک وچ کیویں تبدیلی لیان گے۔
