اسلام آباد( پاکستان پوائنٹ نیوز03۔اگست۔2018ء ) پاکستان تحریک انصاف دیاں سیٹاں وچ وادھا ہویا اے، سیٹاں دی گنتی 116 ہوگئی۔ تفصیل مطا بق پاکستان تحریک انصاف نے 25جولائی نوں ہون والے الیکشن وچ کامیابی حاصل کیتی سی۔ تحریک انصاف دے الیکشن کمیشن ولوں جاری آنکڑیاں(اعدادو شمار) مطابق پاکستان تحریک انصاف نوں 115سیٹاں اُتے کامیابی ملی سی۔ پر ہن پاکستان تحریک انصاف دیاں سیٹاں وچ اچانک وادھا ہو گیا اے، جیہدی وجہ الیکشن کمیشن دے ڈیٹا وچ موجود اک غلطی سی۔
الیکشن کمیشن دے ڈیٹا وچ موجود تحریک انسانیت دی سیٹ وی پاکستان تحریک انصاف دی نکلی۔ ایس حوالے نال الیکشن کمیشن دا کہنا سی کہ پاکستان تحریک انسانیت نامی جماعت الیکشن وچ کوئی سیٹ نہیں لے سکی۔ تحریک انسانیت والی سیٹ اصل وچ پی ٹی آئی دی اے، ڈیٹاوچ غلطی ہوئی۔ قومی اسمبلی دے الیکشن کمیشن ڈیٹا مطابق پی ٹی آئی دیاں سیٹاں 116ہوگئیاں۔ چیتے رہوے کہ پاکستان تحریک انصاف ولوں حکومت بنان دا عمل جاری اے۔ایس حوالے نال اتحادیاں نال وی گل بات ہو رہی اے۔ ایس ویلے پاکستان تحریک انصاف دیاں قومی اسمبلی دیاں سیٹاں دی گنتی 126تیکر اپڑ گئی اے ۔
