اسلام آباد( پاکستان پوائنٹ نیوز03۔اگست۔2018ء ) نجی ٹی وی چینل دے پروگرام وچ گل بات کردے ہوئے سینئر پرچا کار غلام حسین نے آکھیا کہ نواز شریف، مریم نواز تے کیپٹن (ر) صفدر تے اڈیالا جیل وچ موجود نیں پر اوہناں دی تھاں اسحاق ڈار نے لندن وچ خفیہ مذاکرات شروع کیتے ہوئے نیں۔ اوہناں نے آکھیا کہ اسحاق ڈار نے ایہ مذاکرات تے خفیہ ملاقاتاں لندن دے ریاستی اداریاں نال شروع کیتیاں نیں۔
اسحاق ڈار نوں آکھیا گیا کہ پاکستانی اداریاں مطابق جو پیسہ پاکستان توں لُٹ کے ناجائز وسیلیاں راہیں نواز شریف ، اوہناں دے حواری تے دھی پُتر سبھ لے گئے نیں اوہ گھٹو گھٹ 23توں 24ملین ڈالرز اے۔ تُسیں ایہ پیسہ حکومت پاکستان دے حوالے کر دیو تے تحریری سمجھوتا کر کے جتھے جانا چاہندے او اوتھے چلے جاؤ۔جیہدے اُتے اسحاق ڈار نے اوہناں نوں آکھیا کہ اینا پیسہ تے اسیں نہیں لُٹیا بلکہ لُٹیا ای نہیں اے۔
اسیں تے جائز طریقے نال کمائی کیتی اے۔ اسحاق ڈار نے اوہناں نوں آفر کیتی اے کہ اسیں ایس پیسے وچوں 10,12بلین ڈالر چین، ترکی، متحدہ عرب امارات، قطر تے سعودی عرب وچ اپنے وسیلیاں راہیں گھلدے رہے۔ کوئی قطری یاں سعودی شہزادہ 12ملین پاکستانی حکومت نوں دے دیندا اے تے تُسیں ایہ کرو کہ نواز شریف دی بیماری نوں بنیاد بنا کے اوہناں نوں علاج دے بہانے اڈیالا جیل توں رہا کروا کے لندن سدو۔اسحاق ڈار دی آفر رد کر دتی گئی اے تے اوہناں نوں آکھیا گیا کہ تُسیں پہلے تے پائی پائی دا حساب دیو، پہلے حساب ہوئے گا پر جے تُسیں بارگین کرنی اے تے سبھ کُجھ لکھ کے قبول کرنا پئے گا۔ تے دسنا پئے گا کہ اسیں پیسہ کتھوں لیا تے کتھے کتھے گھلیا۔
