لاہور( پاکستان پوائنٹ نیوز03۔اگست۔2018ء ) پاکستان مسلم لیگ (ن) دے رہنما عابد شیر علی ووٹاں دی دوبارہ گنتی لئی لاہور ہائی کورٹ اپڑے، عابد شیر علی دی درخاست اُتے عدالت نے پی ٹی آئی امیدوار فرخ حبیب دی کامیابی دا نوٹی فکیشن روکن دا حکم دے دتا، عدالت وچ کیس دی سنوائی اج ای کیتی جائے گی۔ میڈیا رپورٹس مطابق (ن) لیگی امیدوار عابد شیر علی نے این اے 108وچ دوبارہ گنتی لئی لاہور ہائی کورٹ و چ درخاست دتی اے۔
جیہدے اُتے عدالت نے فرخ حبیب دی کامیابی دا نوٹی فکیشن روکن دا حکم جاری کر دتا۔ دسیا گیا کہ لاہور ہائی کورٹ دے جسٹس شاہ کریم عابد شیر علی خلاف فیصلے اُتے اج ای سنوائی کرن گے۔چیتے رہوے کہ ایس توں پہلاں پچھلے دیہاڑے فیصل آباد دے حلقہ این اے 108وچ ووٹاں دی دوبارہ گنتی مگروں وی تحریک انصاف دے رہنما فرخ حبیب دی جت برقرار رہی۔ مسلم لیگ (ن) دے امیدوار عابد شیر علی نے الیکشن2018وچ ہار اُتے دوبارہ گنتی دی درخاست دتی سی۔
ووٹاں دی دوبارہ گنتی دوران تحریک انصاف دے امیدوار فرخ حبیب دی کامیابی برقرار رہی۔ فرخ حبیب نوں اک لکھ12ہزار28ووٹ جدکہ اوہناں دے مقابلے وچ عابد شیر علی نوں صرف 1لکھ 10ہزار 826ووٹ پئے۔ پر عابد شیر علی ولوں دتی گئی درخاست اُتے دوبارہ گنتی دوران پچھلے دیہاڑے اوہناں دے 701ووٹ گھٹے۔
