اسلام آباد( پاکستان پوائنٹ نیوز03۔اگست۔2018ء ) سابق چیئرمین پاکستان الیکٹرانک میڈیا ریگولیٹری اتھارٹی (پیمرا) ابصار عالم نے اڈیالا جیل وچ قید سابق وزیر اعظم نواز شریف تے اوہناں دی دھی مریم نواز نال ملاقات دی کتھا بیان کر دتی۔ مائیکرو بلاگنگ ویب سائٹ ٹویٹر اُتے اپنے پیغام وچ ابصار عالم دا کہنا سی کہ میری مریم نواز نال جیل وچ ملاقات ہوئی۔
مریم نواز نے مینوں دسیا کہ قید دا ویلاسیل وچ نماز ، تلاوت، وظیفہ تے کتاباں پڑھدے لنگھدا اے۔ اوہناں نے آکھیا کہ اج کل اوریانہ فلاچی دی کتاب ’انٹرویو دہسٹری‘ پڑھ رہی آں۔ مینوں کوئی شکوہ نہیں، کوئی پچھتاوا نہیں۔ جے مینوں 100زندگیاں وی ملن تے انج ای لنگھاواں گی تے ایہو سبھ کراں گی۔ میں اوہناں نوں سوال کیتا کہ تُسیں سبھ توں بُہتا کیہنوں مس کردے او؟جیہدے اُتے اوہناں نے جواب دتا کہ میں سبھ توں بُہتا اپنی دوہتری سیرینا نوں مس کرنی آں۔
ابصار عالم دا کہنا سی کہ مریم نواز نے دسیا کہ مینوں دو اخبار ملدے نیں۔ لوہے دے پلنگ اُتے اک گدا تے جیل دی چادر اے، باتھ روم سیل اندر ای اے۔ سویرے 5وجے سلاخاں والا بوہا کُھلدا اے تے شام 7وجے تالا لگ جاندا اے۔ کسے نال گل کرن دی اجازت نہیں اے۔ اوہناں نے اپنے ٹویٹر پیغام وچ نواز شریف نال ملاقات دی کتھا وی بیان کردے ہوئے آکھیا کہ میں نواز شریف کولوں سوال کیتا کہ قید دیاں 24گھنٹیاں وچوں سبھ توں پرسکون ویلا کیہڑا اے؟جیہدے اُتے میاں صاحب نے جواب دتا کہ سارا ویلا ای پرسکون اے۔نواز شریف نے مینوں دسیا کہ میں ہسپتال توں زبردستی جیل آیا۔ نواز شریف نے دسیا کہ مینوں پہلی رات بیرک دے فرش اُتے سوایا گیا۔ ہن اک لوہے دی منجھی تے اک گدا دتا گیا اے۔
