اسلام آباد( پاکستان پوائنٹ نیوز02۔اگست۔2018ء ) متحدہ اپوزیشن نے عمران خان دے مقابلے وچ مسلم لیگ (ن) دا وزیر اعظم لیان دا اعلان کر دتا۔ ہم خیال جماعتاں دے اجلاس دے آخیر اُتے سینیٹر شیری رحمان دا میڈیا نال گل بات کردے ہوئے کہنا سی کہ قومی اسمبلی وچ سانجھے امیدوار لیاواں گے، وزیر اعظم دا امیدوار (ن) لیگ تے ڈپٹی سپیکر ایم ایم اے توں ہوئے گا۔ تفصیل مطابق اج اسلام آباد وچ ہم خیال جماعتاں دا اجلاس ہویا۔
اجلاس وچ تحریک انصاف نوں ٹف ٹائم دین دے حوالے نال اہم فیصلے کیتے گئے۔ ایس حوالے نال مریم اورنگزیب نے میڈیا نال گل بات کردے ہوئے دسیا کہ اپوزیشن جماعتاں دا اجلاس (ن) لیگی رہنما سردار ایاز صادق دے گھر ہویا۔ اجلاس وچ دھاندلی خلاف بھرپور احتجاج کرن تے اسمبلیاں وچ حکومت نوں سبق سکھان بارے صلاح کیتی گئی۔ اپوزیشن جماعتاں نے آؤندے لائحہ عمل اُتے عملدرآمد لئی 16رکنی کمیٹی بنا دتی۔
کمیٹی وچ سعد رفیق، احسن اقبال، مشاہد حسین سید، شیری رحمان، قمر زمان کائرہ،اویس نورانی، لیاقت بلوچ، گوہر حیدری، غلام احمد بلور، میاں افتخار، عثمان کاکڑ، رضا محمد، امیر کبیر، ملک ایوب سنے ہور شامل نیں۔ مسلم لیگ (ن) دی ترجمان مریم اورنگزیب نے آکھیاکہ سانجھی (مشترکہ) حکمت عملی لئی کمیٹی بنا دتی اے۔ اوہناں نے آکھیا کہ کمیٹی آؤندے لائحہ عمل تے ایوان دی کارروائی دے حوالے نال حکمت عملی طے کرے گی۔
ساریاں جمہوری جماعتاں دا الائنس ہویا اے۔ تحریک انصاف نوں دساں گے کہ اپوزیشن کیہ ہوندی اے۔ ایس موقعے تے ہم خیال جماعتاں نے قومی اسمبلی وچ وزیراعظم،، سپیکر تے ڈپٹی سپیکر دے عہدے لئی سانجھے امیدوار لیان دا اعلان کیتا۔ ایس حوالے نال گل بات کردے ہوئے سینیٹر شیری رحمان دا کہنا سی کہ وزیر اعظم دا امیدوار (ن) لیگ ، سپیکر دا امیدوار پاکستان پیپلز پارٹی جدکہ ڈپٹی سپیکر دا امیدوارایم ایم اے توں ہوئے گا۔ اوہناں نے ایس حوالے نال ہور دسیا کہ ساریاں جماعتاں نے ایوان وچ جان دا فیصلا کر لیا اے۔ کٹھ پُتلی حکومت دا مقابلا کراں گے تے مضبوط اپوزیشن دا کردار ادا کراں گے۔
