اسلام آباد( پاکستان پوائنٹ نیوز02۔اگست۔2018ء ) حساس اداریاں خلاف اسلام آباد ہائی کورٹ دے جج جسٹس شوکت عزیز صدیقی دے ریمارکس عدالتی آرڈر توں حذف کر دتے گئے۔ جمعرات نوں اسلام آباد ہائی کورٹ دے جسٹس عامر فاروق تے جسٹس میاں گل حسن اورنگزیب اُتے مشتمل دو رکنی بنچ نے حساس اداریاں خلاف ریمارکس خذف کرن دی درخاست دی سنوائی کیتی۔ وزارت دفاع دی درخاست اُتے ہائی کورٹ نے عدالتی آرڈر توں جسٹس شوکت عزیز صدیقی دے ریمارکس حذف کر دتے۔
ایڈووکیٹ جنرل طارق محمود جہانگیر نے آکھیا کہ رجسٹرار آفس مطابق کسے وی بنچ دی تشکیل لئی عدلیہ اُتے کوئی دباء نہیں اے جدکہ چیف جسٹس اسلام آباد ہائی کورٹ نے وی بنچ دی تشکیل وچ کسے دباء دے تاثر نوں رد کر دتا اے۔ عدالت نے وزارت دفاع دی درخاست منظور کردے ہوئے معاملا نبیڑ دتا۔ یاد رہوے کہ 18جولائی نوں اسلام آباد ہائی کورٹ دے جسٹس عزیز صدیقی نے لاپتا بندیاں بارے کیس وچ ریمارکس تے آبزرویشن دتی سی کہ عدلیہ تے ہور اداریاں وچ حساس اداریاں دی مداخلت نوں روکیا جائے جو اہم معاملات وچ اپنی مرضی دے بنچ بنوان دی کوشش کردے نیں۔
