لاہور( پاکستان پوائنٹ نیوز02۔اگست۔2018ء ) مسلم لیگ (ن) دے صدر میاں شہباز شریف نے آکھیا اے کہ قومی اسمبلی وچ حلف چُکن مگروں انتخابی دھاندلی خلاف احتجاج کراں گے۔ نجی ٹی وی چینل نال گل بات کردے ہوئے شہباز شریف نے آکھیا کہ نواز شریف نال جیل وچ ملاقات دوران اوہناں نوں الیکشن بارے دسیا، اوہ پرعزم وکھالی دیندے سن۔شہباز شریف دا کہنا سی کہ قومی اسمبلی وچ حلف چُکن مگروں انتخابی دھاندلی خلاف احتجاج کراں گے تے احتجاج بارے نواز شریف نوں دس دتا اے۔
اسیں آواز نہ چُکی تے قوم کدی معاف نہیں کرے گی۔ اوہناں دا کہنا سی کہ ملک نوں ایٹمی طاقت بنان تے لوڈشیڈنگ دے خاتمے دا کریڈٹ نواز شریف کولوں کوئی نہیں کھوہ سکدا۔ آئندے لائحہ عمل بارے سوال اُتے شہباز شریف نے آکھیا کہ آل پارٹیز کانفرنس وچ لائحہ عمل بارے غور ہوئے گا۔دوجے پاسے وسیلیاں دا کہنا اے کہ مسلم لیگ (ن) سڑکاں اُتے احتجاج کرن دی بجائے اسمبلی وچ احتجاج دی حامی اے تے پی سی وچ لائحہ عمل پیش کرے گی کہ ملک ایس صورتحال وچ اے کہ سانوں سڑکاں اُتے احتجاج نہیں کرنا چاہیدا۔
