اسلام آباد( پاکستان پوائنٹ نیوز01۔اگست۔2018ء ) سابق صدر آصف علی زرداری دوالے گھیرا تنگ ہون لگا، ایف آئی اے نے آصف علی زرداری تے اوہناں دی بھین فریال تالپور نوں جے آئی ٹی ساہمنے پیش ہوکے بیان ریکارڈ کروان لئی سد لیا۔ تفصیل مطابق ایف آئی اے بے نامی اکاؤنٹ راہیں منی لانڈرنگ کیس وچ 32بندیاں خلاف تحقیقات کر رہی اے، جیہدے وچ آصف علی زرداری تے فریال تالپور وی شامل نیں۔
ایس سلسلے وچ نجی بنک دے سابق صدر حسین لوائی نوں کُجھ دن پہلے گرفتار کیتا گیا سی۔وفاقی تحقیقاتی ادارے ( ایف آئی اے) نے الیکشن توں پہلاں سابق صدر آصف علی زرداری تے فریال تالپور نوں تحقیقاتی افسر ساہمنے پیش ہون لئی نوٹس جاری کیتا پرایس دوران دوواں شخصیتاں دی قانونی ٹیم پیش ہوئی سی۔ جدکہ سپریم کورٹ نے ایسے کیس وچ ایف آئی اے نوں ہدایت کیتی سی کہ دوویں شخصیتاں نوں الیکشن تیکر نہ سدیا جائے۔
ہن الیکشن ختم ہون مگروں ایف آئی اے نے آصف علی زرداری تے اوہناں دی بھین فریال تالپور نوں تحقیقاتی ٹیم ساہمنے پیش ہون لئی نوٹس جاری کیتا اے۔ایف آئی اے دے نوٹس مطابق آصف علی زرداری تے فریال تالپور نوں 4َُاگست نوں ایف آئی اے ہیڈ کوارٹر اسلام آباد سدیا گیا اے۔ایف آئی اے نے آصف علی زرداری تے اوہناں دی بھین فریال تالپور نوں جے آئی ٹی ساہمنے پیش ہوکے بیان ریکارڈ کروان لئی سد لیا۔
