پنجاب وچ وزارت اعلا دی دوڑ وچ شامل راجا یاسر ہمایوں سزا یافتہ نکلے

لاہور( پاکستان پوائنٹ نیوز01۔اگست۔2018ء ) پنجاب وچ وزارت اعلا دی دوڑ وچ شامل راجا یاسر ہمایوں سزا یافتہ نکلے۔ راجا یاسر نوں 2015وچ ممنوعہ دوائیاں ویچن اُتے ڈرگ کورٹ نے سزا سُنائی سی۔تفصیل مطابق پنجاب دا تخت حاصل کرن لئی مسلم لیگ (ن) تے تحریک انصاف وچکار دوڑ جاری اے۔ پچھلے دیہاڑے تحریک انصاف نے نمبر گیم وچ مسلم لیگ (ن) نوں پچھانہ چھڈ دتا اے۔

25جولائی نوں ہون والے الیکشن دے سرکاری نتیجے مطابق پنجاب وچ مسلم لیگ (ن) نے 129جدکہ تحریک انصاف نے 123سیٹاں لیاں۔ پر ہن تحریک انصاف دا دعوا اے کہ مسلم لیگ (ق) تے آزاد امیدواراں دی حمایت دی وجہ توں اوہدیاں سیٹاں دی گنتی 168تیکر اپڑ گئی اے۔دوجے پاسے پنجاب وچ فتح مگروں تحریک انصاف دے کئی رہنما پنجاب دی وزارت اعلا دے امیدوار بن کے ساہمنے آئے نیں۔

ایہناں امیدواراں وچ شاہ محمود قریشی، فواد چودھری، علیم خان تے یاسمین راشد شامل نیں۔ شاہ محمود قریشی پنجاب اسمبلی دی سیٹ ہارن مگروں وی پنجاب دا وزیر اعلا بنن لئی ضد کر رہے نیں۔ شاہ محمود قریشی نے ایسے وجہ توں وزارت خارجا دا عہدہ لین توں وی معذرت کر لی اے۔ شاہ محمود قریشی نے منگ کیتی کہ پنجاب وچ اونی دیر تیکر عبوری وزیر اعلا لیاندا جائے۔

پچھلے دیہاڑے ایس حوالے نال میاں اسلم اقبال تے راجا یاسر دا ناں ساہمنے آیا ۔ پر تازہ اطلاع مطابق پنجاب دی وزارت اعلا دی دوڑ وچ شامل راجا یاسر ہمایوں سزا یافتہ نکلے۔ راجا یاسر ہمایوں چکول توں پی ٹی آئی دے ٹکٹ اُتے رکن پنجاب اسمبلی چِنے گئے ۔ راجا یاسر ہمایوں دا ایس حوالے نال گل بات کردے ہوئے کہنا سی کہ بیتے ویلے وچ مخالفاں نے سیاسی انتقام دا نشانا بنایا۔ لاہور ہائی کورٹ ڈرگ کورٹ دے فیصلے نوں معطل کر چکی ۔ کیس چل رہیا اے۔ ڈرگ کورٹ دے مقدمے دا حوالا کاغذات نامزدگی وچ موجود اے۔