اسلام آباد( پاکستان پوائنٹ نیوز01۔اگست۔2018ء ) تحریک انصاف دے چیئرمین عمران خان دی نااہلی کیس دی سنوائی کرن والا اسلام آباد ہائی کورٹ دا بنچ ٹُٹ گیا۔ بدھ نوں اسلام آباد ہائی کورٹ دے جسٹس عامر فاروق تے جسٹس میاں گل حسن اورنگزیب اُتے مشتمل بنچ نے عمران خان نااہلی کیس دی سنوائی کیتی۔ عمران خان دی نااہلی لئی درخاست جسٹس اینڈ ڈیموکریٹک پارٹی نے دائر کیتی سی۔
درخاست گزار دے وکیل شیخ احسن الدین نے بنچ بدلن دی استدعا کردے ہوئے آکھیاکہ ساڈی درخاست اُتے پہلاں سنوائی مگروں اک معزز بنچ نے آرڈر جاری کیتا۔ جسٹس عامر فاروق نے آکھیا کہ رجسٹرار آفس نے کیس منتقلی دی درخاست نہ سنوائی جوگ(ناقابل سنوائی) قرار دتی۔ عمران خان دے وکیل ڈاکٹر بابر اعوان نے آکھیا کہ کیس دی دوجے بنچ منتقلی دا اختیار سپریم کورٹ کول اے۔ اسلام آبادہائی کورٹ دے جسٹس عامر فاروق تے میاں گل حسن اورنگزیب اُتے مشتمل بنچ نے سنوائی توں معذرت کر لی۔ چیتے رہوے کہ ایس توں پہلاں بنچ جسٹس عامر فاروق تے جسٹس شوکت عزیز صدیقی اُتے مشتمل سی پر بنچ وچ تبدیلی کر دتی گئی۔ جسٹس شوکت عزیز صدیقی دی تھاں جسٹس میاں گل حسن اورنگزیب نوں شامل کر دتا گیا۔
