فیصل آباد( پاکستان پوائنٹ نیوز31۔جولائی۔2018ء ) این اے 106فیصل آباد توں رانا ثنااللہ دے ووٹ 2540توں گھٹ ہو کے 2223ہوگئے، تحریک انصاف دے رہنما نثار جٹ ولوں ووٹاں دی دوبارہ گنتی دی درخاست دتی گئی، گنتی پوری ہون مگروں وی سابق وزیر قانون دی جت برقرار۔ تفصیل مطابق پنجاب دے دوجے وڈے شہر فیصل آباد دے حلقہ این اے 106وچ ہون والی ووٹاں دی دوبارہ گنتی پوری ہو گئی اے ۔
فیصل آباد دے حلقہ این اے 106وچ مسلم لیگ (ن) دے رانا ثنااللہ نے تحریک انصاف دے نثار جٹ نوں ہرایا سی۔ مسلم لیگ (ن) دے رہنما و سابق وزیر قانون پنجاب رانا ثنا اللہ 1لکھ6ہزار 319ووٹ لے کے کامیاب ہوئے۔ مسلم لیگ (ن) دے رانا ثنااللہ تے تحریک انصاف دے رہنما نثار جٹ وچکار ووٹاں دا مارجن بہت گھٹ رہیا۔ایسے گل نوں مُکھ رکھدے ہوئے تحریک انصاف دے رہنما نثار جٹ نے ووٹاں دی دوبارہ گنتی دی درخاست دتی سی۔ تحریک انصاف دے رہنما دی درخاست اُتے این اے 106وچ ووٹاں دی گنتی ہو ئی۔ ووٹاں دی دوبارہ گنتی وچ مسلم لیگ (ن) دے کامیاب امیدوار رانا ثنااللہ دے ووٹ گھٹے نیں۔ پر ایہدے مگروں وی اوہناں دی جت برقرار رہی۔
