پاکستان تحریک انصاف نے وفاق وچ سادہ اکثریت حاصل کر لی

پاکستان تحریک انصاف نے وفاق وچ سادہ اکثریت حاصل کر لی

لاہور( پاکستان پوائنٹ نیوز30۔جولائی۔2018ء ) پاکستان تحریک انصاف نے وفاق وچ سادہ اکثریت حاصل کر لی، متحدہ قومی موومنٹ مرکز و چ حکومتی بینچاں اُتے بیٹھے گی۔ تفصیل مطابق25جولائی نوں ہون والے الیکشن وچ عددی اعتبار نال پاکستان دی سبھ توں وڈی پارٹی تحریک انصاف بن کے ساہمنے آئی اے۔ پاکستان تحریک انصاف کول قومی اسمبلی دیاں 115سیٹاں سن جیہدے مگروں ہن ایہ طے ہو گیا اے کہ وفاق وچ پاکستان تحریک انصاف حکومت بنائے گی۔

پر ایس حوالے نال پاکستان تحریک انصاف نوں نمبر گیم پوری کرن لئی اتحادیاں دی ضرورت سی جیہدے لئی جوڑ توڑ دا سلسلا جاری رہیا۔ تازہ اطلاع مطابق پاکستان تحریک انصاف نے سادہ اکثریت حاصل کرلی اے۔ ایس حوالے نال گل بات کردے ہوئے تحریک انصاف دے ترجمان فواد چودھری دا کہنا سی کہ پاکستان تحریک انصاف نے وفاق وچ نمبر گیم پوری کر لی اے۔ اتحادیاں نوں رلاکے ہن تیکر پاکستان تحریک انصاف 168دے عدد تیکر اپڑ گئی اے۔ ایس سلسلے وچ اوہناں دا ہور دسنا سی کہ ایم کیو ایم پاکستان نے وفاق وچ حکومتی بینچاں اُتے بیٹھن دا فیصلا کرلیا اے۔ اوہناں دا ہور کہنا سی کہ اج جہانگیر ترین ایم کیو ایم دے قائدین نال ملاقات کرن گے جیہدے مگروں ایم کیو ایم دی قیادت کوئی اعلان کرے گی۔