نویں دِلّی( پاکستان پوائنٹ نیوز30۔جولائی۔2018ء ) پاکستان تحریک انصاف دے چیئرمین تے وزیر اعظم دے مضبوط اُمیدوارعمران خان دی حکومت بندی ویکھ کے بھارت نے پی ٹی آئی نال رابطے تیز کر دِتے۔ میڈیا رپورٹس مطابق الیکشن وچ عمران خان دی کامیابی اُتے بھارتی وزیر خارجا نے اپنے بیان وچ آکھیا کہ سانوں آس اے پاکستان دی نویں حکومت جنوبی ایشیا نُوں دہشت گردی، تشدد توں آزاد، محفوظ، مضبوط تے ترقی یافتہ بناون وچ اہم کردار نبھاوے گی۔
رپورٹس مطابق بھارت نے آکھیا کہ پاکستانی عوام دا خیال اے کہ وزیر اعظم نریندر مودی پاکستان دے سابق وزیر اعظم نواز شریف دی دوبارہ حکومت ویکھنا چاہندے نیں ۔ پر ایس گل وچ کوئی سچائی نہیں اوہ اُکا انج نہیں چاہندے ‘ اوہناں لئی ساریاں جماعتاں برابر نیں۔ وسیلیاں دا آکھنا اے کہ بھارت دی خاہش اے کہ پاکستان تحریک انصاف تے پاکستان دیاں دُوجیاں سیاسی جماعتاں نال وی اوہناں دے چنگے تعلقات بنن جیہناں وچ مسلم لیگ ن تے پاکستان پیپلز پارٹی وی شامل اے۔ رپورٹ وچ آکھیا گیا کہ بھارتی حکام نے وزیر اعظم مودی توں عمران خان نُوں مبارکباد دین دی منگ نہیں کیتی جدوں کہ افغانستان دے صدر اشرف غنی نے پچھلے دیہاڑ ے عمران خان نُوں فون تے مبارک باد دِتی سی۔
