اسلام آباد( پاکستان پوائنٹ نیوز28۔جولائی۔2018ء ) پاکستان تحریک انصاف دے رہنما نعیم الحق نے آکھیا اے کہ جمہوری نظام الُٹان والے اپنی سوچ بدلن، سیاسی جماعتاں توں اپیل اے کہ حکومت بنن دین راہ وچ روڑے نہ سُٹن، مخالفاں نوں پتا ہونا چاہیدا لوکائی کیہ چاہندی اے، پنجاب تے خیبرپختونخوا وچ چھیتی وزیر اعلا دے ناواں دا اعلان کراں گے، عمران خان 14اگست توں پہلاں وزیراعظم دا حلف چُکن گے۔
اوہناں نے اج میڈیا نال گل بات کردے ہوئے آکھیا کہ ساڈی پنجاب حکومت دے حوالے نال رابطے ہو گئے نیں۔ چھیتی خشخبری دیواں گے۔ وفاق وچ وی ساڈی وڈی پارٹی بن گئی اے۔ مرکز وچ وی ساڈی ای بنے گی۔ عمران خان 14اگست نوں وزیر اعظم دا حلف چُکن گے۔ اوہناں نے آکھیا کہ پوری قوم چاہندی اے کہ عمران خان چھیتی حکومت سنبھالن تے عوامی ایجنڈے نوں پورا کرن۔ معیشت تباہ ہو گئی اے تے ملک خطرے وچ اے۔
اوہناں نے آکھیا کہ فضل الرحمان اجے وی منفی سوچ دا اظہار کر رہے نیں۔ اوہناں نے فاٹا انضمام وچ وی مخالفت کیتی سی۔ نعیم الحق نے آکھیا کہ جو لوک جمہوری نظام اُلٹان دا سوچ رہے اوہ اپنی سوچ بدلن۔ جمہوری عمل نوں الُٹان والیاں توں اپیل اے کہ حکومت بنن جار رہی اے ایہدے وچ روڑے نہ سُٹن۔ ساڈی حکومت نوں چلن دیو۔ مخالفاں نوں پتا ہونا چاہیدا کہ پاکستانی لوکائی کیہ چاہندی اے۔
اوہناں دا کہنا سی کہ جہانگیر ترین دے آزاد امیدواراں نال رابطے ہوئے نیں۔ چھیتی آزاد امیدوار ساڈے نال ہون گے۔ عمران خان دی رہنمائی وچ پوری پارٹی اکٹھی اے۔ شاہ محمود قریشی تے جہانگیر ترین وچ کوئی اختلاف نہیں اے۔ اوہناں نے آکھیا کہ چودھری نثار جے ساڈے نال رابطہ کرنا چاہندے نیں تے ضرور کرن پر ساڈے ولوں کوئی رابطہ نہیں ہویا۔
