لاہور( پاکستان پوائنٹ نیوز28۔جولائی۔2018ء ) مسلم لیگ (ن) پنجاب وچ حکومت بنان لئی متحرک ہو گئی اے۔ میڈیا رپورٹ مطابق پنجاب وچ حکومت بنان لئی مسلم لیگ (ن) نے 150ارکان دا ہدف پورا کر لیا اے۔ وسیلیاں نے دسیا کہ لیگی قیادت پنجاب وچ اپنا ہدف پورا کرن دا اعلان اک پریس کانفرنس وچ کرے گی۔ مسلم لیگ (ن) نے پنجاب توں کامیاب ہون والے کئی آزاد امیدواراں دی حمایت حاصل کر لی اے۔
وسیلیاں دا کہنا اے کہ مسلم لیگ (ن) وچ فارورڈ بلاک وی بن سکدا اے۔ مسلم لیگ (ن) نے فارورڈ بلاک بنان والیاں نوں واضح آکھ دتا اے کہ اوہ ڈی سیٹ ہو جان گے۔ لیگی وسیلیاں مطابق 18ویں ترمیم مگروں فارورڈ بلاک نہیں بنایا جا سکدا۔چیتے رہوے کہ پچھلے دیہاڑے خبر آئی سی کہ پنجاب وچ پاکستان مسلم لیگ (ن) دی نویں حکومت بنن توں پہلاں فارورڈ بلاک بنن دی آس پیدا ہوگئی، 20توں25لیگی صوبائی ارکان دے اپنے سینئر ز نال رابطے کرن دا انکشاف ہویا اے۔
وسیلیاں مطابق حمزہ شہباز نوں جے وزیر اعلا پنجاب بنایا جاندا اے تے ایس صورت وچ (ن) لیگ اندر فارورڈ بلاک بن جائے گا ۔وسیلیاں مطابق پاکستان مسلم لیگ (ن) دے دو درجن صوبائی ارکان نے اپنے سینئر پارلیمنٹرینرز نال رابطے کردے ہوئے آکھیا اے کہ پنجاب وچ مسلم لیگ (ن) دی حکومت نوں کسے صورت قبول کرن نوں تیار نہیں آں، انج دی صورتحال وچ جے پاکستان تحریک انصاف اوہناں نوں قبول کرے تے اوہ (ن) لیگ توں وکھ ہو کے اک فارورڈ بلاک بنان لئی کردار ادا کرن گے۔دوجے پاسے پاکستان تحریک انصاف دے وسیلیاں دا کہنا سی کہ فارورڈ بلاک بنان وچ پاکستان تحریک انصاف کوئی دلچسپی نہیں رکھدی تے ایس قسم دے امیدواراں نوں پارٹی وچ تھاں ملن یاں نہ ملن اُتے کوئی وی تبصرہ نہیں کیتا جاسکدا۔
