اسلام آباد( پاکستان پوائنٹ نیوز27۔جولائی۔2018ء ) پاکستان تحریک انصاف ولوں ڈاکٹر یاسمین راشد نوں وزیر اعلا بنائے جان دی آس اے۔ ڈاکٹر یاسمین راشد نوں مخصوص سیٹ اُتے لیا کے وزیر اعلا پنجاب بنائے جان دی آس اے۔ قانونی پہلواں بارے غور کیتا جا رہیا اے۔ تفصیل مطابق حکومت بنان دے حوالے نال پنجاب اہم ترین صوبہ بن گیا اے۔ صورتحال ایہ اے کہ مسلم لیگ (ن) کول عدد ی اکثریت تے موجود اے پر اوہناں دیاں سیٹاں دی گنتی 129اے جدکہ پاکستان تحریک انصاف دیاں سیٹاں دی گنتی 122ہو گئی اے۔
ایس توں وکھ آزاد امیدواراں دی گنتی 25تیکر جا اپڑی اے ۔ ایس حوالے نال پنجاب وچ حکومت بنان لئی مسلم لیگ (ن) تے پاکستان تحریک انصاف وچ وڈا میچ ہو سکدا اے۔ ایس ساری صورتحال وچ پنجاب اسمبلی لئی منتخب ہون والے آزاد امیدواراں دا کردار انتہائی اہم ہوگیا اے۔ پنجاب وچ حکومت کون بنائے گا ایہدا فیصلا آزاد امیدواراں دی رلت (شرکت)نال ای ہوئے گا۔
پر ایس حوالے نال پاکستان تحریک انصاف ولوں دعوا کیتا اے گیا کہ 18آزاد امیدواراں نال اوہناں دے معاملات طے ہو گئے نیں جیہدے مگروں پنجاب وچ تحریک انصاف دی حکومت لئی راہ پدھر ہو گئی اے۔ ایس ساری صورتحال و چ دوویں جماعتاں یعنی مسلم لیگ (ن) تے تحریک انصاف ولوں ممکنہ وزیر اعلا دے ناواں بارے غور شروع کر دتا گیا اے۔ پاکستان تحریک انصاف ولوں جیہڑے ناواں بارے سنجیدگی نال غور کیتا جا رہیا اے اوہ ڈاکٹر یاسمین راشد نیں۔
ڈاکٹر یاسمین راشد نوں مخصوص سیٹ اُتے لیا کے وزیر اعلا بنائے جان دی آس اے۔ ایس حوالے نال قانونی ماہرین دا کہنا اے کہ ڈاکٹر یاسمین راشد نوں مخصوص سیٹ اُتے لیا کے وزیر اعلا پنجاب بنائے جان وچ کوئی قانونی رکاوٹ نہیں اے کیونکہ ایہدے لئی 62,63اُتے پورا اُترنا ضروری اے تے مخصوص سیٹاں اُتے منتخب ارکان اسمبلی نوں وی اوہی اختیارات حاصل ہوندے نیں جو عام انتخابات وچ منتخب ہو کے ہوندے نیں۔
