لاہور( پاکستان پوائنٹ نیوز26۔جولائی۔2018ء ) مظفر گڑھ دا وڈا سیاسی اپ سیٹ ساہمنے آگیا۔ عوامی راج پارٹی دے سربراہ جمشید دستی قومی اسمبلی دیاں دوویں سیٹاں توں ہار گئے۔ تفصیل مطابق عام انتخابات 2018 دے تحت پچھلے دیہاڑے ملک بھر وچ پولنگ ہوئی۔پر ہن وی غیر سرکاری غیر حتمی نتیجے آن دا سلسلا جاری اے۔ ایس سلسلے وچ قومی اسمبلی دیاں 272 وچوں 260سیٹاں دے کئی پولنگ سٹیشناں دے غیر سرکاری غیر حتمی نتیجے وی ساہمنے آ گئے نیں۔
ہن تیکر ملن والیاں اطلاعواں مطابق تحریک انصاف باقی جماعتاں توں اگے اے۔ قومی اسمبلی دیاں سیٹاں دے غیر سرکاری غیر حتمی نتیجے مطابق تحریک انصاف نے ہن تیکر 120، (ن) لیگ نے 61،پیپلز پارٹی نے 40جدکہ16آزادامیدواراں نے کامیابی حاصل کیتی اے۔پر تازہ اطلاع مطابق انتخابات 2018دا اک ہور وڈا سیاسی اپ سیٹ ساہمنے آ گیا اے۔ عوامی راج پارٹی دے سربراہ جمشید دستی وی ہار گئے نیں۔ جمشید دستی مظفر گڑھ دے 2حلقیاں توں میدان وچ لتھے سن پر تازہ اطلاع مطابق اوہ دوویں سیٹاں وچوں اک سیٹ وی نہیں جت سکے ۔چیتے رہوے کہ جمشید دستی نوں مظفر گڑھ دی سیاست دا وڈا ناں سمجھیا جاندا اے ۔
