پیپلز پارٹی سندھ وچ حکومت بنان دی پوزیشن وچ آگئی

پیپلز پارٹی سندھ وچ حکومت بنان دی پوزیشن وچ آگئی

کراچی( پاکستان پوائنٹ نیوز26۔جولائی۔2018ء ) عام انتخابات 2018 دے تحت پچھلے دیہاڑے ملک بھر وچ پولنگ ہوئی۔پر ہن وی غیر سرکاری غیر حتمی نتیجے آن دا سلسلا جاری اے۔ ایس سلسلے وچ قومی اسمبلی دیاں 272 وچوں 260سیٹاں دے کئی پولنگ سٹیشناں دے غیر سرکاری غیر حتمی نتیجے وی ساہمنے آ گئے نیں۔ ہن تیکر ملن والیاں اطلاعواں مطابق تحریک انصاف باقی جماعتاں توں اگے اے۔

قومی اسمبلی دیاں سیٹاں دے غیر سرکاری غیر حتمی نتیجے مطابق تحریک انصاف نے ہن تیکر 120، (ن) لیگ نے 61،پیپلز پارٹی نے 40جدکہ16آزادامیدواراں نے کامیابی حاصل کیتی اے۔اطلاع مطابق پاکستان پیپلز پارٹی سندھ فتح کرن وچ کامیاب ہو گئی اے۔ سندھ اسمبلی دیاں 130جنرل سیٹاں دے غیر حتمی تے غیر سرکاری نتیجیاں مطابق پیپلز پارٹی 74سیٹاں اُتے اگے اے۔ جیہدے مگروں پاکستان پیپلز پارٹی سندھ وچ حکومت بنان دی پوزیشن وچ آگئی اے۔

پیپلز پارٹی لگاتار تیجی وار سندھ وچ حکومت بنان والی جماعت بن جائے گی۔ تحریک انصاف نے سندھ وچ 18،متحدہ قومی موومنٹ پاکستان نے13، گرینڈ ڈیموکریٹک الائنس نے11، تحریک لبیک پاکستان نے3تے متحدہ مجلس عمل نے اک سیٹ جتی اے۔ سندھ اسمبلی دے ایوان وچ مجموعی سیٹاں دی گنتی 168اے جیہدے وچ 29سیٹاں سوانیاں جدکہ 9سیٹاں اقلیتاں لئی مخصوص نیں۔ ملک بھر توں نتیجے آن دا سلسلا اجے وی جاری اے۔

پیپلز پارٹی ایوان وچ مکمل طور اُتے حکومت بنان دی پوزیشن وچ ہوئے گی۔ ایس توں وکھ ایس الیکشن وچ سندھ وچ بہت تبدیلی ویکھن نوں ملی اے۔ 7وڈیاں جماعتاں دے سربرہواں نوں کئی حلقیاں توں الیکشن وچ تواریخی اپ سیٹ دا ساہمنا کرنا نا پیااے۔ مسلم لیگ (ن) دے شہباز شریف، جمعیت علمائے اسلام (ف)دے مولانا فضل الرحمان، جماعت اسلامی دے سراج الحق، عوامی نیشنل پارٹی دے اسفند یار ولی خان، قومی وطن پارٹی دے آفتاب شیر پاؤ تے کراچی توں پاک سرزمین پارٹی دے مصطفی کمال نوں وی ہار دا ساہمنا کرنا پیا اے۔