اسیں پرائم منسٹر ہاؤس نوں تعلیمی ادارہ بناواں گے:عمران خان

نتھیا گلی دے گورنر ہاؤس نوں لوکاں لئی کھولاں گے،سارے ریسٹ ہاؤسز نوں کمرشل بناواں گے، اوتھوں آن والے پیسیاں نوں مقامی لوکاں اُتے خرچ کراں گے:عمران خان دا قوم نال خطاب

اسیں پرائم منسٹر ہاؤس نوں تعلیمی ادارہ بناواں گے:عمران خان
 نتھیا گلی دے گورنر ہاؤس نوں لوکاں لئی کھولاں گے،سارے ریسٹ ہاؤسز نوں کمرشل بناواں گے، اوتھوں آن والے پیسیاں نوں مقامی لوکاں اُتے خرچ کراں گے:عمران خان دا قوم نال خطاب

اسلام آباد( پاکستان پوائنٹ نیوز26۔جولائی۔2018ء ) اسیں سارے خرچے گھٹ کراں گے، میں پرائم منسٹر ہاؤس وچ نہیں رہواں گا، اسیں پرائم منسٹر ہاؤس نوں تعلیمی ادارہ بناواں گے۔ نتھیا گلی دے گورنر ہاؤس نوں لوکاں لئی کھولاں گے۔سارے ریسٹ ہاؤسز نوں کمرشل بناواں گے۔ اوتھوں آن والے پیسیاں نوں مقامی لوکاں اُتے خرچ کراں گے۔ عمران خان نے اج جت مگروں قوم نال خطاب کردے ہوئے آکھیا کہ اسیں سارے خرچے گھٹ کراں گے۔

میں پرائم منسٹر ہاؤس وچ نہیں رہواں گا۔ اسیں پرائم منسٹر ہاؤس نوں تعلیمی ادارہ بناواں گے۔ نتھیا گلی دے گورنر ہاؤس نوں لوکاں لئی کھولاں گے۔سارے ریسٹ ہاؤسز نوں کمرشل بناواں گے۔ اوتھوں آن والے پیسیاں نوں مقامی لوکاں اُتے خرچ کراں گے۔اوہناں دا کہنا سی کہ میں ایہ کم اپنے تے اپنے وزیراں توں شروع کراں گا۔اسیں قوم نوں دساں گے کہ اسیں ایس کرائسز توں نکلنا اے، اسیں اپنے ادارے مضبوط کرنے نیں، اسیں آمدنی ودھانی اے، اسیں بزنس کمیونٹی نال رلکے چلنا اے۔

اوہناں دا کہنا سی کہ اسیں نوجواناں نوں نوکریاں دیواں گے۔ٹیکس کلچر ٹھیک کراں گے۔ لوکاں دا ٹیکس چوری نہیں ہوئے گا۔ نیب نوں مضبوط کراں گے۔ کساناں دی ساری گورنمنٹ مدد کرے گی۔ نِکے کاروبار والیاں دی مدد کراں گے۔ نوجواناں نوں نوکریاں دیواں۔ جو وی ساڈا پیسہ ہوئے گا اوہ اسیں اپنی قوم اُتے خرچ کراں گے۔ اوہناں دا کہنا سی کہ ساڈی ایس ویلے فارن پالیسی وچ بہت مسئلا اے۔

ساڈے گوانڈھیاں نال تعلقات چنگے ہونے چاہیدے۔ چائنہ نال ہور تعلقات پکے کراں گے۔ چائنہ نے سی پیک شروع کیتا، اسیں چائنہ کولوں سکھاں گے۔ کیونکہ 70کروڑلوکاں نوں چائنہ نے غربت وچوں کڈھیا۔ اسیں اوہدے کولوں مدد لواں گے۔ چائنہ توں دوجی شے جو اسیں سکھاں اوہ کرپشن دا خاتمہ اے۔ چائنہ نے اپنے وزیراں نوں وی کرپشن اُتے سزا دتی۔ دوجا ملک افغانستان اے۔

افغانستان اوہ ملک اے جیہنے دہشت گردی وچ سبھ توں ودھ انساناں دیاں قربانیاں دتیاں۔ افغانستان دے لوکاں نوں امن دی ضرورت اے۔ افغانستان وچ امن ہوئے گا تے پاکستان وچ امن ہوئے گا۔ ساڈی کوشش ہوئے گی کہ اسیں افغانستان وچ امن لیائے۔ میں چاہنا واں کہ ساڈے افغانستان نال ایس طرحاں دے تعلقات ہو جان گے کہ اسیں وی یورپ طرحاں باڈر کھول دئیے۔عمران خان دا کہنا سی کہ اسیں امریکا نال وی اکو طرحاں دے تعلقات قائم کراں گے۔

ایس طرحاں دے تعلقات جیہدے نال دوواں ملکاں نوں فائدہ ہوئے۔ ایران نال اسیں ہور تعلقات بہتر کرنا چاہنے آں۔ سعودی عرب نال وی اسیں بہتر تعلقات قائم کرنا چاہنے آں۔ اسیں مڈل ایسٹ وچ ثالث دا کردار ادا کرنا چاہنے آں۔ اسیں ایہناں نوں اکٹھا کرنا چاہنے آں۔ اسیں اوہ ملک بنانا چاہنے آں جو کہ دوجیاں نوں نال لے کے ٹُرے۔ہندوستان بارے اوہناں دا گل بات کردے ہوئے کہنا سی کہ الیکشن دوران ہندوستان دے میڈیا نے جس طرحاں میرے نال کیتا، مینوں لگا کہ میں بالی ووڈ فلماں دا ہیرو آں۔

اوہناں دا کہنا سی کہ میں اوہ پاکستانی آں جیہنے بہتا ہندوستان پھریا اے۔ پاکستان تے ہندوستان دے تعلقات چنگے ہون وچ بہتری اے۔ سبھ توں بہتر ہوئے گا کہ اسیں اک دوجے نال تجارت کرئیے۔ پر بدقسمتی اے کہ ساڈے ایشوز وچ کور ایشوز کشمیر اے، کشمیروچ لوکاں دی توہین جاری اے۔ پاکستان تے ہندوستان دی لیڈر شپ نوں اک ٹیبل اُتے بہ کے گل کرنی چاہیدی۔ اسیں سمجھدے آں کہ تعلقات بہتر بنان وچ جے ہندوستان دی لیڈر شپ تیار اے تے اسیں وی تیار آں۔

جے اوہ اک پیر اگانہ ودھن گے تے اسیں دو پیر ودھاواں گے۔میں چاہواں گا کہ اسیں برصغیر دی بہتری لئی گل بات نال مسئلیاں نوں حل کرئیے۔ میں آخیر وچ اپنے قوم نال وعدہ کرنا واں کہ اسیں اپنا گورنمنٹ سسٹم ٹھیک کر سکنے آں۔ ایسا گورنمنٹ سسٹم جو لوکاں نوں پاکستان وچ انوسٹمنٹ کرن دا موقع دیوے گا۔عمران خان دا کہنا سی کہ میری کوشش ہوئے گی کہ میں سادگی نال رہواں۔قوم پاکستان وچ گُڈ گورننس ویکھے گے۔آخیر اُتے اوہناں دا کہنا سی جیہڑے حلقیاں وچ دھاندلی ہوئی، اسیں اوہ حلقے کھولاں گے، جیہڑیاں پارٹیاں ہن رولا پا رہیاں، اوہناں نے اودوں ساڈی گل نہیں منی۔ جو آکھدا دھاندلی ہوئی اسیں اوہدی مدد کراں گے ۔ اسیں اوہناں نال رلکے تفتیش کراں گے۔