لاہور( پاکستان پوائنٹ نیوز26۔جولائی۔2018ء ) پاکستان تحریک انصاف دی حلقہ این اے 125تے حلقہ این اے 129وچ ممکنہ کامیابی دی خشی کُجھ گھنٹیاں بعد ای غم وچ بدل گئی، پی ٹی آئی دے حامیاں نے رات نوں بھرپور جشن منایا پر سویرے بازی ای پلٹ گئی۔ تفصیل مطابق پی ٹی آئی دی امیدوار ڈاکٹر یاسمین راشد تے مسلم لیگ (ن) دے وحید عالم وچکار مقابلا ہویا تے کل رات تیکر دے نتیجے مطابق پی ٹی آئی دے حامیاں ولوں مرکزی دفتر سنے کئی تھاواں اُتے بھرپور جشن منایا گیا۔
پر سویرے غیر حتمی تے غیر سرکاری نتیجے مطابق (ن) لیگ دے وحید عالم نے کامیابی حاصل کیتی، جیہدے اُتے پی ٹی آئی دے کارکناں وچ مایوسی کھلر گئی تے اوہناں دے مونہ لٹک گئے۔پر بھرپور مقابلا کرن اُتے یاسمین راشد نوں نہ صرف اپنی جماعت بلکہ دوجیاں جماعتاں دے رہنماواں ولوں وی سلاہیا گیا اے۔ دوجے پاسے میڈیا رپورٹس مطابق حلقہ این اے 129وچ وی رات گئے تیکر بازی عبدالعلیم خان دے حق وچ سی پر جمعرات دی سویر ریٹرننگ افسر ولوں غیر حتمی تے غیر سرکاری نتیجے ساہمنے آن اُتے پی ٹی آئی ہار گئی تے (ن) لیگ دے سردار ایاز صادق جت گئے۔
