فیصل آباد( پاکستان پوائنٹ نیوز25۔جولائی۔2018ء ) فیصل آباد دا وڈا سیاسی مقابلا جاری اے۔ مڈھلے نتیجیاں مطابق فیصل آباد دے سارے حلقیاں وچ پاکستان تحریک انصاف اگے اے۔ تفصیل مطابق ایس ویلے ملک بھر دے سارے پولنگ سٹیشناں اُتے پولنگ دا عمل ہو گیا اے تے ووٹاں دی گنتی جاری اے۔ ایس موقعے تے وڈے وڈے برج الُٹن دی آس اے۔پنجاب وچ لاہور مگروں فیصل آباد اندر وی تگڑا سیاسی مقابلا ہون دی آس کیتی جا رہی اے۔
دوویں جماعتاں نے اک دوجے ساہمنے اپنے تگڑے امیدوار کھڑے کیتے۔ اہم مقابلا این اے 106وچ ہون دی آس اے جتھے (ن) لیگ دے رانا ثنا اللہ دا مقابلا (ن) لیگ چھڈ کے تحریک انصاف جوائن کرن والے نثار جٹ نال ہوئے گا۔ این اے 108وچ عابد شیر علی دا مقابلا تحریک انصاف دے فرخ حبیب نال اے۔ این اے 102توں طلال چودھری دا مقابلا تحریک انصاف دے نواب شیر و سیر نال اے۔ ہن تیکر دی اطلاع مطابق پاکستان تحریک انصاف مسلم لیگ (ن) توں اگے اے۔
