رخصتی توں پہلاں دلہن ووٹ کاسٹ کرن اپڑی

لاہور( پاکستان پوائنٹ نیوز25۔جولائی۔2018ء ) رخصتی توں پہلاں دلہن ووٹ کاسٹ کرن اپڑی۔ میڈیا رپورٹس وچ دسیا گیا اے کہ شیخ پورہ دے علاقے فاروق آباد وچ دلہن رخصی توں پہلاں ووٹ دین پولنگ سٹیشن اپڑی۔ تفصیل مطابق ووٹ پان وچ لاڑی وی پچھانہ نہ رہی ۔ ووٹنگ والے دن لاڑی(دلہن) وی ووٹ پان اپڑی۔ ایس موقعے تے لاڑی دا کہنا سی کہ پاکستان نوں ترقی دی راہ اُتے لیجان لئی ووٹ دینا ضروری اے۔

لاڑی دا کہنا سی کہ ویاہ اہم فرض اے پر ووٹ دینا وی بہت ضروری اے۔ چیتے رہوے کہ ایس توں پہلاں اک لاڑا وی شیروانی پاکے ووٹ دین اپڑیا سی۔لاڑا ملتان دے حلقہ پی پی 216وچ ووٹ کاسٹ کرن لئی اپڑیا۔ شیروانی پائے لاڑے نے کیمپ وچ اپڑ کے اپنی پرچی بنوائی۔لاڑے بہادر علی دا کہنا سی کہ اوہدی جنج مظفر گڑھ جانی اے تے جنج جان دا ویلا 2وجے دا اے۔ سبھ نے مینوں ووٹ پان توں منع کیتا پر میں آکھیا کہ میں ووٹ پائے بغیر نہیں جاواں گا۔