لاہور( پاکستان پوائنٹ نیوز25۔جولائی۔2018ء ) الیکشن کمیشن آف پاکستان نے پولنگ دا اک گھنٹہ ویلا نہ ودھان دا فیصلا کر لیا، ہن پولنگ دا ویلا 6وجے تیکر ای رہوے گا، پر الیکشن کمیشن نے انتخابی عملے نوں پولنگ دا عمل تیز کرن دی وی ہدایت کر دتی اے۔ میڈیا رپورٹس مطابق ملک بھر وچ اج عام انتخابات 2018لئی پولنگ عمل سویرے 8وجے توں جاری اے۔ پر پولنگ سٹیشناں اُتے گرمی، حبس، کئی تھاواں اُتے بارش تے انتخابی عملے دی رفتار سست ہون دی وجہ توں ٹرن آؤٹ اجے گھٹ اے۔
جیہدی وجہ توں مسلم لیگ (ن)، پیپلز پارٹی تے عوامی مسلم لیگ نے الیکشن کمیشن توں پولنگ سٹیشناں اُتے اک گھنٹہ ویلا ودھان دی منگ کیتی۔ مسلم لیگ (ن) نے چیف الیکشن نوں ایس حوالے نال خط وی لکھیا۔ ایس توں وکھ پیپلز پارٹی نے وی پولنگ دا ویلا ودھان دی منگ کیتی۔ پر دوجے پاسے الیکشن کمیشن آف پاکستان نے ساریاں جماعتاں دے مطالبیاں اُتے غور کردے ہوئے صلاح مگروں پولنگ داویلا نہ ودھان دا فیصلا کیتا۔ الیکشن کمیشن نے واضح کیتا کہ پولنگ دا ویلا نہیں ودھایا جائے گا۔ پر 6وجے تیکر جِنے لوکاں دی لائن ہوئے گی اوہناں نوں ووٹ پان دا حق دتا جائے گا۔
