الیکشن2018:اک کروڑ سوانیاں ووٹ نہیں پا سکن گیاں

کراچی( پاکستان پوائنٹ نیوز24۔جولائی۔2018ء ) حکومتی اعلاناں تے کروڑاں رُپیاں دی اشتہاری مہم مگروں 25جولائی نوں ہون والے عام انتخابات وچ اک کروڑ توں ودھ سوانیاں ووٹ نہیں پا سکن گیاں۔ رپورٹ مطابق الیکشن کمیشن مرد تے سوانیاں دے ووٹراں دی گنتی وچ فرق ختم نہ کر سکیا جدکہ80لکھ سوانیاں دے شناختی کارڈ وی نہ بنے۔ 2013دے الیکشن وچ مرد تے سوانیاں دے رجسٹرڈ ووٹراں دی گنتی وچ اک کروڑ نو لکھ 95ہزار 142دا فرق سی۔ 25جولائی 2018نوں ہون والے الیکشن وچ ایہ فرق اک کروڑ 24لکھ ہو گیا اے۔ سبھ توں ودھ صنفی فرق پنجاب وچ 65لکھ 87ہزار116، سندھ وچ 24لکھ 82ہزار444، خیبرپختونخوا وچ 20لکھ 95ہزار ، بلوچستان وچ چھ لکھ72ہزار 966، فاٹا وچ پنج لکھ پنج ہزار650تے اسلام آباد وچ 49ہزار 578اے۔