لاہور( پاکستان پوائنٹ نیوز24۔جولائی۔2018ء ) ہار دا ڈر یاں کُجھ ہورگل؟ تحریک انصاف عمران خان نوں این اے 131توں جتوان لئی پیسہ ورتن لگی۔ پاکپتن دے دوالی علاقے توں آئی وڈیری مائی نے بھانڈا بھن دتا۔ سوانی نے نوجوان پرچا کار نوں دسیا کہ اوہنوں 5000رُپئے دے کے آکھیا گیا کہ ووٹ عمران خان نوں دینا اے۔ تفصیل مطابق پاکستان تحریک انصاف دے سربراہ عمران خان بنوں ، اسلام آباد، میانوالی، لاہور تے کراچی توں الیکشن وچ حصہ لے رہے نیں۔
ایس موقعے تے اسلام آباد تے لاہور دے حلقیاں نوں عمران خان لئی اہم قرار دتا جا رہیا اے۔ لاہور وچ عمران خان دا مقابلا مسلم لیگ (ن) دے مرکزی رہنما و سابق وفاقی وزیر ریلوے خواجا سعد رفیق نال اے۔ پر تحریک انصاف عمران خان نوں این اے 131توں جتوان لئی بے چین اے۔ اطلاع مطابق لاہوروں باہر دے ووٹ این اے 131وچ منتقل کروائے جا رہے نیں۔ اجیہی اک سوانی نال اک نوجوان پرچا کار نے ملاقات کیتی ۔
ایس دوران وڈیری مائی نے دسیا کہ میرے دوہترے نے میرا ووٹ ایتھے منتقل کروایا تے ایس لئی کروایا کہ ایتھے ووٹ پان دے پیسے ملدے نیں۔ اوہناں دا کہنا سی کہ میں پاکپتن توں لاہور آئی تے آرے باز دے اک شادی ہال وچ گئی جتھے اوہناں نے مینوں 5ہزار رُپئے دے کے آکھیا کہ ووٹ عمران خان نوں پانا اے۔ نوجوان پرچا کار نے ذکر کیتی گئی وڈیری مائی دے ہتھ وچ پرچی ویکھی تے اوہ آرے بازار دے پولنگ سٹیشن دی پرچی سی۔چیتے رہوے کہ آرے بازار قومی اسمبلی دے حلقہ این اے 131دا حصہ اے جتھوں عمران خان الیکشن لڑ رہے نیں تے اوہناں دا مقابلا مسلم لیگ (ن) دے امیدوار خواجا سعد رفیق نال اے۔
