عمران خان کدی وزیراعظم نہیں بنن گے:منظور وسان نے اک ہور پیشنگوئی کر دتی

عمران خان کدی وزیراعظم نہیں بنن گے:منظور وسان نے اک ہور پیشنگوئی کر دتی

کراچی( پاکستان پوائنٹ نیوز24۔جولائی۔2018ء ) پاکستان پیپلز پارٹی دے رہنما منظور وسان نے پی ٹی آئی چیئرمین عمران خان دے وزیر اعظم نہ بنن بارے پیشنگوئی کر دتی۔ پیپلز پارٹی رہنما منظور وسان نے پی ٹی آئی نوں بُری خبر سُناندے ہوئے آکھیا کہ عمران خان کدی وی وزیراعظم نہیں بنن گے۔ اوہناں نے آکھیا کہ عمران خان شارٹ کٹ وچ وزیر اعظم بنن دی ناکام کوشش کر رہے نیں۔

اوہناں دا کہنا سی کہ ایس وار کوئی وی پارٹی کلی حکومت بنان دی پوزیشن وچ نہیں ہوئے گی۔ اوہناں دا کہنا سی کہ چودھری نثار علی خان پیپلز پارٹی د ی حکمت عملی نوں مندے نیں۔ الیکشن کمیشن کول کوئی اختیار نہیں نیں۔ الیکشن کمیشن نے سندھ وچ جو فوجی جوان طلب کیتے نیں اوہ صرف گشت ای نہ کرن۔ اوہناں نے ہور آکھیا کہ پیپلز پارٹی کراچی توں قومی اسمبلی دیاں 17سیٹاں اُتے کامیاب ہوئے گی کیونکہ ہن ایم کیو ایم کراچی وچ ونڈی گئی اے۔

جیہدا فائدہ پیپلز پارٹی نوں ہوئے گا۔ اوہناں نے آکھیا کہ جی ڈی اے والے 2013توں وی گھٹ سیٹاں اُتے کامیاب ہون گے۔ منظور وسان نے آکھیا کہ مینوں 2018دے ایہ الیکشن شفاف ہوندے نظر نہیں آ رہے۔ اوہناں نے پیپلز پارٹی دے امیدواراں کولوں سکیورٹی واپس جدکہ مخالف امیدواراں نوں فول پروف سکیورٹی دین اُتے وی اعتراض چُکیا۔