لاہور( پاکستان پوائنٹ نیوز24۔جولائی۔2018ء ) لاہور ہائی کورٹ راولپنڈی بنچ مگروں سپریم کورٹ نے وی شیخ رشید دی ایپل رد کر دتی اے، عدالت نے الیکشن کمیشن دا فیصلا برقرار رکھیا اے، عدالتی فیصلے دی وجہ توں این اے 60وچ ہن الیکشن نہیں ہوئے گا۔ میڈیا رپورٹس مطابق سپریم کورٹ لاہور رجسٹری وچ چیف جسٹس ثاقب نثار نے شیخ رشید دی درخاست اُتے کیس دی سنوائی کیتی۔
چیف جسٹس سپریم کورٹ نے شیخ رشید دی استدعا رد کردے ہوئے ریمارکس دتے کہ اہم قانونی نقطے دی تشریح لئی کیس دی سنوائی کیتی۔ واک اوور اُتے جان دی بجائے الیکشن لڑن اپنے لئے نہیں ووٹراں لئی الیکشن لڑن۔ شیخ رشید دوجے حلقے وچ الیکشن لڑ رہے نیں اوہناں دا پتال چل جائے گا۔چیتے رہوے کہ ایس تو پہلاں پچھلے دیہاڑے لاہور ہائی کورٹ دے راولپنڈی بنچ نے عوامی مسلم لیگ دے سربراہ شیخ رشید دی این اے 60وچ الیکشن کروان تے الیکشن کمیشن دا انتخابی عمل ملتوی کرن دی درخاست رد کر دتی سی۔
عدالت نے این اے 60راولپنڈی وچ الیکشن ملتوی کرن دا فیصلا برقرار رکھدے ہوئے الیکشن کمیشن دا نوٹی فکیشن بحال کر دتا سی۔ نوٹی فکیشن دے تحت الیکشن کمیشن نے (ن) لیگی امیدوار حنیف عباسی دی انسداد منشیات عدالت وچ ایفی ڈرین کیس وچ نااہلی تے عمر قید دی سزا دے بعد الیکشن ملتوی کرن دا نوٹی فکیشن جاری کیتا سی۔ شیخ رشید دی درخاست اُتے لاہور ہائی کورٹ دے جسٹس مجاہدمستقیم نے فیصلا سُنایاسی۔
