راولپنڈی( پاکستان پوائنٹ نیوز23۔جولائی۔2018ء ) لاہور ہائی کورٹ راولپنڈی بنچ نے شیخ رشید دی اپیل رد کر دتی۔ عدالت نے الیکشن کمیشن د ا فیصلا برقرار رکھیا۔ عدالتی فیصلے مگروں این اے 60وچ ہن الیکشن نہیں ہوئے گا۔ میڈیا رپورٹس مطابق لاہور ہائی کورٹ دے راولپنڈی بنچ نے عوامی مسلم لیگ دے سربراہ شیخ رشید دی این اے 60وچ الیکشن کروان تے الیکشن کمیشن دا انتخابی عمل ملتوی کرن دی درخاست رد کر دتی اے۔
عدالت نے این اے 60راولپنڈیء وچ الیکشن ملتوی کرن دا فیصلا برقرار رکھدے ہوئے الیکشن کمیشن دا نوٹی فکیشن بحال کر دتا اے۔ جیہدے تحت الیکشن کمیشن نے (ن) لیگی امیدوار حنیف عباسی دی انسداد منشیات عدالت وچ ایفی ڈرین کیس وچ نااہلی تے عمر قید دی سزا دے بعد الیکشن ملتوی کرن دا نوٹی فکیشن جاری کیتا سی۔ شیخ رشید دی درخاست اُتے لاہور ہائی کورٹ دے جسٹس مجاہدمستقیم نے فیصلا سُنایا۔
ایس توں پہلاں اج عدالت نے فیصلا محفوظ کر لیا سی، جو ہن سُنا دتا گیا اے۔ چیتے رہوے کہ شیخ رشید ولوں سردار عبدالرزاق ایڈووکیٹ نے لاہور ہائی کورٹ دے راولپنڈی بنچ وچ درخاست دائر کیتی گئی سی۔ درخاست وچ الیکشن کمیشن تے ریٹرننگ افسر نوں فریق بنایا گیا۔ پر این اے 60توں امیدوار راشد گردیزی تے الیکشن کمیشن دے وکیلاں نے شیخ رشید دی درخاست رد کرن دی استدعا کیتی سی۔
درخاست گزار دے وکیل نے آکھیا سی کہ جے مسلم لیگ (ن) دے امیدوار نوں لکھاں ووٹ پے جاندے تے اوہ ووٹ کس مد وچ جان گے ، ایہدے اُتے فاضل جج نے وکیل توں پُچھیا کہ بیلٹ پیپرز دی چھپائی وچ کِنا چِر لگے گا جیہدے اُتے وکیل الیکشن کمیشن نے دسیا کہ چھپائی وچ چوکھا ویلا لگے گا، 7لکھ توں ودھ ووٹرز نیں جیہدے اُتے فاضل جج نے پُچھیا کہ کیہ ایس بارے تُسیں الیکشن کمیشن کولوں کوئی ہدایتاں لِتیاں نیں یاں اپنے ولوں ایہ آکھ رہے او۔ جواب وچ وکیل الیکشن کمیشن نے آکھیا کہ میں ساریاں معلومات الیکشن کمیشن توں لے کے پیش ہویا آں، بیلٹ پیپرز دی چھپائی آسان کم نہیں اے۔
