اسلام آباد( پاکستان پوائنٹ نیوز23۔جولائی۔2018ء ) عمران خان دی نااہلی دی درخاست اُتے جسٹس شوکت عزیزصدیقی نے حکم جاری کر دتا، سابق چیف جسٹس افتخار چودھری ولوں دائر درخاست اُتے تحریک انصاف دے سربراہ تے الیکشن کمیشن کولوں جواب منگ لیا۔ تفصیل مطابق پیر دے دیہاڑے اسلام آباد ہائی کورٹ وچ عمران خان دی نااہلی لئی دائر درخاست دی سنوائی ہوئی۔ درخاست سابق چیف جسٹس افتخار چودھری دی جماعت ولوں دائر کیتی گئی۔
افتخار چودھری دی جماعت ولوں دائر درخاست وچ موقف اختیار کیتا گیا اے کہ عمران خان اک ناجائز دھی دے والد نیں تے اوس دھی نوں قبول کرن توں وی انکاری نیں، ایس لئی اوہناں نوں نااہل قرار دتا جائے۔ درخاست وچ منگ کیتی گئی اے کہ تحریک انصاف دے سربراہ عمران خان نوں آئین دے آرٹیکل 62تے 63دے تحت نااہل قرار دتا جائے۔ درخاست دی سنوائی اسلام آباد ہائی کورٹ دے جج شوکت عزیز صدیقی تے جسٹس عامر فاروق ولوں کیتی گئی۔ جسٹس شوکت عزیز صدیقی نے درخاست گزار دے وکیل دا موقف سُنن مگروں عمران خان تے الیکشن کمیشن نوں جواب جمع کروان دا حکم دتا اے۔ جسٹس شوکت عزیز صدیقی نے وضاحت لئی عمران خان تے الیکشن کمیشن دے نمائندے نوں وی عدالت وچ حاضر ہون دا حکم دتا اے۔
