اسلام آباد( پاکستان پوائنٹ نیوز23۔جولائی۔2018ء ) الیکشن کمیشن آف پاکستان ولوں قومی اسمبلی دے حلقہ این اے 60 (راولپنڈی) دے الیکشن ملتوی کرن دے فیصلے خلاف عوامی مسلم لیگ دے سربراہ شیخ رشید دی درخاست اُتے لاہور ہائی کورٹ نے فیصلا محفوظ کر لیا۔ لاہور ہائی کورٹ راولپنڈی بنچ دے جسٹس مجاہد مستقیم نے شیخ رشید احمد دی درخاست اُتے سنوائی کیتی۔ چیتے رہوے کہ شیخ رشید ولوں سردار عبدالرزاق ایڈووکیٹ نے لاہور ہائی کورٹ دے راولپنڈی بنچ وچ درخاست دائر کیتی اے۔
درخاست وچ الیکشن کمیشن تے ریٹرننگ افسر نوں فریق بنایا گیا۔ پر این اے 60توں امیدوار راشد گردیزی تے الیکشن کمیشن دے وکیلاں نے شیخ رشید دی درخاست رد کرن دی استدعا کیتی۔ درخاست گزار دے وکیل نے آکھیا جے مسلم لیگ (ن) دے امیدوار نوں لکھاں ووٹ پے جاندے تے اوہ ووٹ کس مد وچ جان گے ، ایہدے اُتے فاضل جج نے وکیل توں پُچھیا کہ بیلٹ پیپرز دی چھپائی وچ کِنا چِر لگے گا جیہدے اُتے وکیل الیکشن کمیشن نے دسیا کہ چھپائی وچ چوکھا ویلا لگے گا، 7لکھ توں ودھ ووٹرز نیں جیہدے اُتے فاضل جج نے پُچھیا کہ کیہ ایس بارے تُسیں الیکشن کمیشن کولوں کوئی ہدایتاں لِتیاں نیں یاں اپنے ولوں ایہ آکھ رہے او۔
جواب وچ وکیل الیکشن کمیشن نے آکھیا کہ میں ساریاں معلومات الیکشن کمیشن توں لے کے پیش ہویا آں، بیلٹ پیپرز دی چھپائی آسان کم نہیں اے۔
