اسلام آباد( پاکستان پوائنٹ نیوز23۔جولائی۔2018ء ) وزیر اعظم آزاد کشمیر راجا فاروق حیدر نے صدر مملکت ممنون حسین نال ٹیلی فونک رابطہ کیتا۔ایس دوران وزیر اعظم آزاد کشمیر راجا فاروق حیدر نے سابق وزیر اعظم نواز شریف دی طبیعت خراب ہون اُتے تشویش دا اظہا رکیتا۔ راجا فاروق حیدر نے آکھیا کہ نواز شریف دی صحت بارے خبراں اُتے تشویش اے۔ وزیراعظم آزاد کشمیر نے آکھیا کہ جے نواز شریف نوں کُجھ ہویا تے ذمے وار نگران حکومت ہوئے گی۔
دوجے پاسے وزیر اعلا گلگت بلتستان نے وی سابق وزیر اعظم نواز شریف دی اڈیالا جیل وچ طبیعت خراب ہون اُتے نگران وزیر اعظم ناصر الملک نال رابطہ کیتا تے نواز شریف دی طبیعت خرابی اُتے تشویش دا اظہار کیتا۔ وزیر اعلا گلگت بلتستان حافظ حفیظ الرحمان نے منگ کیتی کہ نگران وزیر اعظم صورتحال دا نوٹس لین۔ چیتے رہوے کہ پچھلے دیہاڑے سابق وزیراعظم نواز شریف دی اڈیالا جیل وچ طبیعت وگڑ گئی سی۔
جیہدے اُتے راولپنڈی انسٹی ٹیوٹ آف کارڈیالوجی(آر آئی سی) دے ڈاکٹراں نے اڈیالا جیل وچ نواز شریف دا ڈاکٹری معائنہ کیتا۔ ڈاکٹراں نے نواز شریف دے خون تے پیشاب دے ٹیسٹ وی کیتے جیہدے وچ نمونیاں نوں غیر تسلی بخش قرار دتا گیا۔ جیل وسیلیاں مطابق ڈاکٹراں نے نواز شریف نوں ڈاکٹری امداد دین تے ہسپتال منتقل کرن دی صلاح دتی۔
