لاہور( پاکستان پوائنٹ نیوز23۔جولائی۔2018ء ) پچھلے دیہاڑے پاکستان تحریک انصاف دے چیئرمین عمران خان نے برطانوی اخبارنوں انٹرویو دیندے ہوئے آکھیا سی کہ ریحام خان نال ویاہ میری زندگی دی سبھ توں وڈی غلطی سی جیہدے مگروں ریحام خان دا وی اک آڈیو پیغام ساہمنے آیا اے۔ ریحام خان نے اپنے آڈیو پیغام وچ آکھیا اے کہ اک بچی دا فو ن آیا تے اوہنے مینوں دسیا کہ میں تہاڈی کتاب پڑھی اے۔
ریحام خان دا کہنا سی کہ اوس کُڑی نال تقریبن ڈھائی گھنٹے میری فون اُتے گل بات ہوئی۔ کُڑی نے مینوں دسیا کہ اوہدے نال عمران خان نے کیہ کیتا اے۔ اوہنے آکھیا کہ جو قصہ میں تہانوں سُنایا اے اوہ میں اپنی ماں نوں وی نہیں دس سکدی پر جدوں میں کتاب پڑھی تے اوہدے وچ اوہی اکھر ویکھے جو کہ عمران خان مینوں وی آکھدے سن۔ ریحام خان دا کہنا سی کہ عمران خان اوہدے والد دی تھاں نیں تے اوہ نوجوان کُڑی شاید آس وی نہیں کر رہی سی کہ انج ہو جائے گا۔
اوہ ڈاڈھے صدمے وچ سی۔ عمران خان نے بالڑی دا ناجائز فائدہ چُکیا تے اوہدے نال جنسی تعلق رکھے، اوہنوں گلاں وچ لیاندا گیا ۔ ریحام خان دا کہنا سی کہ اوہ بالڑی عدالت وچ وی گواہی دین لئی تیار اے۔ ریحام خان دا کہنا سی کہ میں ہمت کیتی اے تے ہن سانوں کسے توں ڈرنا نہیں اے۔ چیتے رہوے کہ عمران خان دی دوجی سابق بیوی ریحام خان نے عمران خان توں طلاق ملن مگروں اوہناں اُتے کئی الزام لائے۔
