اسلام آباد( پاکستان پوائنٹ نیوز21۔جولائی۔2018ء ) نجی ٹی وی چینل دے پروگرام وچ گل بات کردے ہوئے اینکر نے پی ٹی آئی رہنما نعیم بخاری توں سوال کیتا کہ انج دے بہت سارے تاثرات دتے جا رہے نیں کہ پی ٹی آئی پچھے کسے طاقت یاں ملٹری اسٹیبلشمنٹ دا ہتھ اے، ایس بارے تُسیں کیہ آکھو گے؟جیہدے اُتے نعیم بخاری نے آکھیا کہ انج کُجھ نہیں اے، میں تے پارٹی اندر آں مینوں کدی ایسی کوئی حرکت یاں موومنٹ وکھالی نہیں دتی جیہدے توں ایہ ثابت ہوندا ہوئے کہ ایہ فوج کر رہی اے۔
اوہناں نے آکھیا کہ میرا ایس طرحاں دا خیال نہیں اے۔ الیکشن کمیشن آف پاکستان نے الیکشن لئی جو سسٹم بنایا اے اوہ تقریبن فول پروف اے۔ آخر وچ سارے نتیجے نادرا کول جانے نیں تے اوتھے فوج بیٹھی ہوئی اے۔ جے تُسیں ایہ آکھدے او کہ فوج نے فیصلا کر لیا اے کہ عمران خان نوں وزیراعظم بنانا اے تے فیر الیکشن دی کیہ ضرورت اے؟تُسیں ٹیک اوور کر لوو تے عمران خان نوں وزیراعظم بنا دیو۔ اوہناں نے آکھیا کہ مینوں ایس کہانی وچ واضح طور اُتے کُجھ سمجھ نہیں آؤندا۔ دوجی گل ایہ اے کہ زرداری صاحب دی اک بہت وڈی کرپشن ساہمنے آئی اے۔ جیہنوں اجے چیف جسٹس آف پاکستان نے صرف تولیا اے تے میں تہانوں ایہ لِکھ کے دینا واں کہ زرداری صاحب چھیتی ملک چھڈ کے چلے جان گے۔
