لاہور( پاکستان پوائنٹ نیوز20۔جولائی۔2018ء ) نواز شریف نوں جیل گھلن دا فیصلا 4سال پہلے کر لیا گیا سی۔ مشہور کالم نگار طارق بٹ دا کہنا اے کہ سابق وزیر اعظم نواز شریف نوں جیل گھلن دا فیصلا 4سال پہلے کر لیا گیا سی۔ اک جج نے ایہ وی آکھیا سی کہ نواز شریف لئی اڈیالا جیل وچ تھاں خالی اے۔ تفصیل مطا بق مشہور کالم نگار طارق بٹ دا اپنے کالم ’خیالی پلاؤ‘ وچ کہنا اے کہ سابق وزیر اعظم نواز شریف، اوہناں دی دھی مریم نواز تے داماد کیپٹن (ر) صفدر جیل چلے گئے نیں۔
پچھلے 4ورھیاں توں ایہو پلان سی کہ ہر صورت معزول وزیر اعظم نوں جیل وچ بند کرنا اے۔ عدالت عظمی دے اک جج صاحب نے وی کوئی دو سال پہلے وزیراعظم نواز شریف نوں مخاطب کردے ہوئے آکھیا سی کہ اڈیالا جیل وچ اوہناں لئی اجے کُجھ تھاں خالی اے۔ نواز شریف تے مریم نواز جیل جان توں نسے نہیں نیں بلکہ آپ فیصلا کر کے کالی کھوٹھڑی وچ بند ہون لئی لندن توں پاکستان آئے۔
ایس طرحاں گھٹ ای سیاستدان کردے نیں تے آمر انج دے حالات وچ اک ملک توں دوجے ملک نسدے رہندے نیں جیہدی سجری (تازہ) مثال پرویز مشرف دی اے۔ طارق بٹ دا اپنے کالم وچ ہور کہنا سی کہ پہلے نواز شریف نوں وزارت عظمی توں باہر کڈھیا گیا، فیر اوہناں دے الیکشن لڑن اُتے زندگی بھر لئی پابندی لا دتی گئی ، فیر اوہناں نوں (ن) لیگ دی صدارت توں ہٹا دتا گیا۔ فیر اوہناں نوں 11سال قید دی سزا سُنائی گئی اے۔ تے ہن جیل وچ اوہ سلوک کیتا جا رہیا اے جو اوہناں قیدیاں نال کیتا جاندا اے جو خطرناک جرماں وچ ملوث ہون۔
