لاہور( پاکستان پوائنٹ نیوز20۔جولائی۔2018ء ) سپریم کورٹ نے دیامر بھاشا تے مہمند ڈیم دی اُساری دا حکم جاری کیتا تے پاکستان بھر دے لوکاں نے ڈیماں دی اُساری لئی ودھ چڑھ کے حصہ پانا شروع کردتا۔ ایس سلسلے وچ محکمہ صحت لاہور دے ملازماں نے وی دیامر بھاشا ڈیم تے مہمند ڈیم دی اُساری ہون تیکر ہر مہینے اک دن دی تنخاہ عطیہ کرن دا اعلان کیتا اے۔میڈیا رپورٹ مطابق سیکرٹری جنرل یو ایچ ایف (یونائیٹڈ ہیلتھ فیڈریشن)محمد سلیمان خان نے آکھیا کہ عطیہ دین لئی یو ایچ ایف لاہور ولوں سی ای او ہیلتھ لاہور نوں درخاست جمع کروا دتی گئی اے۔
درخاست وچ آکھیا گیا اے کہ یو ایچ ایف دے سارے ملازماں دیاں تنخاہواں وچوں ہر مہینے اک دن دی تنخاہ کٹ کے دیامر بھاشا تے مہمند ڈیم دے اکاؤنٹ وچ جمع کروا دتی جائے۔ایتھے ایہ گل ذکر جوگ اے کہ ضلع لاہور دے 8000 دے قریب ملازم نیں جیہناں دی ہر مہینے صرف اک دن دی تنخاہ تقریبن 41لکھ بندی اے۔ چیتے رہوے کہ پاکستان بھر وچ ہر آؤندے دن نوں پانی دی کمی وچ وادھا ہو رہیا اے تے ایسے گل نوں مُکھ رکھدے ہوئے سپریم کورٹ نے 2ڈیمز بنان دا حکم جاری کیتا سی۔
پاکستان وچ ڈیمز دی اُساری(تعمیر) لئی آپ چیف جسٹس آف پاکستان جسٹس ثاقب نثار نے وی اپنی جیب وچوں 10لکھ رُپئے عطیہ دتا۔ ایس توں وکھ پاک فوج نے ڈیماں دی اُساری(تعمیر) وچ حصہ پان دا اعلان کیتا۔آئی ایس پی آر مطابق تِنوں فوجاں دے سربراہ و افسر 2 جدکہ جوان اک دن دی تنخاہ کارخیر وچ جمع کروان گے۔ ترجمان پاک فوج میجر جنرل آصف غفور نے آکھیا سی کہ پاک فوج وی ڈیماں دی اُساری وچ اپنا حصہ ودھ کے پائے گی۔
پاک فوج دیامیر بھاشا ڈیم تے مہمند ڈیم دے فنڈز وچ حصہ قومی فرض سمجھدے ہوئے پائے گی۔ ایس توں وکھ سپریم کورٹ ولوں ڈیماں دی فنڈنگ لئی ایس ایم ایس دا آسان طریقہ کاروی متعارف کروا دتا گیا ، جیہدے تحت موبائل ورتیندڑ(صارف) میسج سروس راہیں 10رُپئے ڈیماں دی اُساری اکاؤنٹ وچ عطیہ کر سکدے نیں۔جیہدے مگروں ہن تیکر سپریم کورٹ آف پاکستان ولوں دیامر بھاشا تے مہمند ڈیماں دی اُساری لئی قائم فنڈ وچ پیسے جمع کروان دا سلسلا جاری اے۔
ایس توں وکھ نگران وزیر خارجا عبداللہ حسین ہارون نے اپنی ساری تنخاہ دیامر بھاشا تے مہمند ڈیم دی اُساری لئی عطیہ کر دتی۔ واپڈا دے سابق چیئرمین انجینئر شمس الملک تے شکیل درانی نے دیامر بھاشا تے مہمند دی اُساری لئی اک ، اک لکھ رُپئے عطیہ دین دا اعلان کردے ہوئے واضح کیتا اے کہ توانائی دے ایہناں دوویں پراجیکٹس دی اُساری نال پاکستان وچ پانی دی کمی تے بجلی پیدا کرن ورگے وڈے مسئلے اُتے قابو پا لیا جائے گا۔
دوجے پاسے امریکا وچ وسدے پاکستانی گلوکار علی زمان نے وی ڈیمز دی اُساری لئی فنڈ جمع کرن دی مہم دا اعلان کیتا ہویا اے۔ اوہ امریکا دے کئی شہراں وچ رہن والے پاکستانیاں نال ملاقات کرن گے تے اوہناں توں پاکستان وچ ڈیماں دی اُساری لئی فنڈ جمع کرن گے۔نیویارک وچ پاکستانی امریکن کمیونٹی نے سپریم کورٹ دے چیف جسٹس میاں ثاقب نثار دی اپیل اُتے دیامر بھاشا تے مہمند ڈیم دی اُساری لئی فنڈریزنگ مہم دی شروعات کر دتی اے۔
