چمن( پاکستان پوائنٹ نیوز20۔جولائی۔2018ء ) چمن دی مشہور سڑک مال روڈاُتے دھماکا ہویا۔ میڈیا رپورٹ مطابق چمن دی سڑک مال روڈ اُتے زور دار دھماکا ہویا۔ دھماکے دی اطلاع ملدے ای پولیس تے قانون نافذ کرن والے ادارے موقعے اُتے اپڑ گئے۔ امدادی ٹیماں نوں حادثے والی تھاں ٹور دتا گیا اے۔ پولیس دا کہنا اے کہ دھماکے مگروں فائرنگ وی کیتی گئی۔ دھماکے تے فائرنگ دے نتیجے وچ چار اہلکار زخمی ہو گئے جدکہ دھماکے وچ موتاں دا خدشہ اے۔
ریسکیو حکام نے زخمیاں نوں ڈاکٹری امداد دین لئی ہسپتال منتقل کرنا شروع کر دتا اے۔ پولیس دا کہنا اے کہ دھماکا سڑک کنڈھے کھلوتی موٹر سائیکل وچ ہویا۔ دھماکا ریمورٹ کنٹرول ڈیوائس نال کیتا گیا تے دھماکے وچ قانون نافذ کرن والے اداریاں دی گڈی نوں نشانہ بنایا گیا۔ دھماکے دی آواز دور دور تیکر سُنی گئی۔ عینی شاہداں دا کہنا اے کہ دھماکا اوس ویلے ہویا جدوں پٹرولنگ دی گڈی لنگھ رہی سی۔ دھماکے دی تھاں توں دھوئیں تے بدل نکل رہے نیں۔ دھماکے ویلے لاگے دیاں مسجداں وچ جمعے دی نماز پڑھی جا رہی سی۔
