اسلام آ باد( پاکستان پوائنٹ نیوز19۔جولائی۔2018ء ) ترجمان دفتر خارجاڈاکٹر فیصل نے آکھیا اے کہ بھارت کلبھوشن دے جعلی یاں اصلی پاسپورٹ اُتے جواب نہیں دے سکیا، پچھلے ہفتے مقبوضہ کشمیر وچ 23کشمیریاں نوں شہید کیتا گیا، بلوچستان تے خیبرپختونخوا وچ دہشت گرد حملیاں دی وجہ توں قوم اُداس اے، جمہوری تے انتخابی عمل جاری رہوے گا۔ میڈیا رپورٹس مطابق ترجمان دفتر خارجا ڈاکٹر فیصل نے میڈیا نوں ہفتہ وار بریفنگ دیندے ہوئے آکھیا کہ پاکستان اوہناں ملکاں دا شکر گزار اے جیہناں نے دہشت گردی دے واقعیاں اُتے دُکھ دا اظہار کیتا۔
بلوچستان تے کے پی کے وچ دہشت گرد حملیاں نے پوری قوم نوں اُداس کر دتا اے۔ سارے ملک وچ جمہوری تے انتخابی عمل جاری رہوے گا۔ اوہناں نے آکھیا کہ پاکستان الیکشن دوران ایہناں دہشت گردی دے واقعیاں توں خوفزادہ ہون والا نہیں اے۔ ترجمان دفتر خارجا دا مقبوضہ کشمیر وچ انسانی حقاں دیاں خلاف ورزیاں بارے گل بات کردے ہوئے کہنا سی کہ پچھلے ہفتے دوران مقبوضہ کشمیر وچ 23کشمیریاں نوں شہید کر دتا گیا۔
بھارت ولوں مقبوضہ کشمیر وچ انسانی حقاں دیاں خلاف ورزیاں دا سلسلا اجے تیکر جاری اے۔ اوہناں نے مطالبہ کیتاکہ عالمی براداری بھارت ولوں وادی مقبوضہ کشمیر وچ ہون والیاں انسانی حقاں دیاں خلاف ورزیاں دا نوٹس لئے۔ڈاکٹر فیصل نے دسیا کہ بھارت اجے تیکر کلبھوشن دے حسین مبارک پٹیل دے ناں اُتے بنے جعلی یاں اصل پاسپورٹ اُتے جواب نہیں دے سکیا۔ بھارت کلبھوشن یادیو دا پچھلے سال کیس عالمی عدالت انصاف وچ لے کے گیا سی۔ پاکستان نے کلبھوشن یادیو دے کیس وچ بھارتی اعتراضاں اُتے اپنا جواب جمع کروا دتا اے۔ اوہناں نے میڈیا نوں دسیا کہ کلبھوشن ایس پاسپورٹ اُتے 17وار بھارت دا سفر کر چکیا اے۔ایس طرحاں بھارت اجے تیکر کلبھوشن دی ریٹائرمنٹ بارے وی کوئی ثبوت دین وچ ناکام رہیا اے۔
