پشاور( پاکستان پوائنٹ نیوز19۔جولائی۔2018ء ) پشاور میٹرو منصوبہ کیس دے تفصیلی فیصلے وچ اہم انکشافات ساہمنے آ گئے۔ پشاور ہائی کورٹ نے بس ریپڈ ٹرانزٹ(بی آر ٹی) کیس وچ تفصیلی فیصلا جاری کر دتا اے۔ فیصلے مطابق پشاور میٹر دا ٹھیکہ جس فرم نوں دتا گیا اوہ دوجے صوبیاں وچ پہلے توں بلیک لسٹ سی۔ عدالت نے کیس وچ ہور تحقیقات تے پیش رفت لئی کیس نوں نیب کول گھل دتا۔
میڈیا رپورٹ مطابق پشاور میٹرو بس کیس دا تفصیلی فیصلا جاری کر دتا گیا اے۔ ہائی کورٹ نے ایس فیصلے وچ لکھیا اے کہ منصوبہ 24جون 2018نوں پورا ہونا سی پر اجے تیکر پورا نہیں ہو سکیا تے منصوبے دی لاگت وی 49.3توں ودھ کے 67.9بلین رُپئے تیکر اپڑ گئی اے۔ تفصیلی فیصلے وچ ایہ وی لکھیا گیا اے کہ خیبرپختونخوا دی سابق حکومت نے ہور منصوبیاں دے فنڈ وی پشاور میٹر اُتے لائے۔ چیتے رہوے کہ چیئرمین نیب نے پہلے ای منصوبے وچ غیر معمولی دیر دا نوٹس لے کے تحقیقات دا حکم دتا سی ، جیہدے اُتے پشاور ڈویلپمنٹ اتھارٹی نے اک وضاحتی بیان جاری کردے ہوئے آکھیا سی کہ پی ڈی اے نے کدی وی منصوبے دی جون وچ تکمیل دا دعوا نہیں کیتا۔ ایس قسم دے سارے دعوے سابق صوبائی حکومت دے وزیر کردے رہے۔
