پاکستان تحریک انصاف دا جہلم وچ سیاسی شو ناکام ہو گیا

جہلم( پاکستان پوائنٹ نیوز18۔جولائی۔2018ء ) پاکستان تحریک انصاف دا جہلم وچ جلسہ کمزور سیاسی شو ثابت ہویا اے۔ تحریک انصاف دے جلسے وچ لوکاں دی گنتی تے خالی کرسیاں نے پارٹی قیادت لئی خطرے دی گھنٹی وجا دتی۔ تفصیل مطابق الیکشن دے دن جیویں جیویں نظر آ رہے نیں، اوویں اوویں سیاسی جماعتاں ولوں جلسے جلوساں دا بھرپور انعقاد کیتا جا رہیا اے۔ ایس سلسلے وچ بدھ دے دیہاڑے تحریک انصاف نے پنجاب دے شہر جہلم وچ جلسہ کیتا۔ جلسے نال تحریک انصاف دے سربراہ عمران خان نے خطاب کیتا جدکہ ایس موقعے تے مقامی قیادت وی موجود سی۔ میڈیا رپورٹس مطابق پاکستان تحریک انصاف جہلم وچ بھرواں جلسہ کرن وچ ناکام رہی اے۔ایس موقعے تے عمران خان نے مخالفاں نوں ڈاڈھی تنقید دا نشانہ بنایا۔ اوہناں دا کہنا سی کہ حکمراناں دی چوری تے کرپشن دی قیمت قوم مہنگائی دی صورت وچ دے رہی اے۔ قرضیاں دی ادائیگی لئی بجلی اُتے ٹیکس لایا گیا۔ اوہناں دا کہنا سی کہ لوکائی دا پیسا لوکائی اُتے خرچ کراں گے۔ کرپٹ بندے کرپشن نہیں ختم کر سکدے۔اوہناں دا کہنا سی کہ حکمران سندھ تے پنجاب پولیس راہیں لوکاں اُتے ظلم کردے نیں۔ اوہناں دا کہنا سی کہ جدوں تیکر ادارے ٹھیک نہیں کراں گے اودوں تیکر پیسا اکٹھا نہیں ہوئے گا۔ عمران خان دا کہنا سی کہ زرداری تے نواز شریف توں جان چھڈوانی اے۔