اسلام آباد( پاکستان پوائنٹ نیوز18۔جولائی۔2018ء ) پاکستان نے اپنی ڈُبی معیشت نوں سہارا دین لئی بین الاقوامی مالیاتی فنڈ (آئی ایم ایف) نال بیل آؤٹ پیکج لئی رابطہ کر لیا اے پر آئی ایم ایف نے واضح کر دتا اے کہ اوہدیاں شرطاں اُتے عملدرآمد تے جامع اصلاحات دے ایجنڈے دے بغیر پاکستان نوں کوئی بیل آؤٹ پیکج نہیں دتا جائے گا۔ وزارت خزانہ دے وسیلیاں دا کہنا اے کہ نگران وزیر خزانہ ڈاکٹر شمشاد اختر نے آئی ایم ایف حکام نال ایس حوالے نال گل بات وی کیتی سی پر نگران حکومت نوں کیونکہ ایس طرحاں دا اہم سمجھوتا کرن تے پالیسی فیصلا لین دا اختیار نہیں، وزیر خزانہ جان توں پہلاں آن والی حکومت لئی ایس بارے جامع سفارشاں مرتب کرکے جان گے۔
وسیلیاں دا کہنا اے کہ ملکی معیشت، بیرونی قرضیاں دی واپسی، نویں قرضے لین اتے بیل آؤٹ پیکج لئی آئی ایم ایف نال رابطہ کیتا گیا اے پر پہلاں صلاح لئی آئی ایم ایف نے اصلاحات دی لسٹ پاکستانی حکام دے حوالے کر دتی اے تے ہن الیکشن مگروں اگست2018وچ نویں آن والی حکومت لئی سبھ توں وڈا چیلنج آئی ایم ایف دیاں شرطاں اُتے عملدرآمد کرنا ہوئے گا، کیونکہ ایہدے بغیر آئی ایم ایف نے پیشگی منگ کر دتی اے کہ نویں قرض لئی بجلی تے گیس دیاں قیمتاں وچ وادھا کیتا جائے، ٹیکس اصلاحات کر کے ٹیکس نیٹ وچ وادھا کیتا جائے، ٹیکس وصولیا ں ودھائیاں جان، رُپئے دی قدر وچ ہور کمی کیتی جائے تے اوہنوں حقیقی سطح اُتے لیاندا جائے، بجلی دیاں ونڈ کار کمپنیاں دی نجکاری کیتی جائے تے لائن لاسز نوں صفر کیتا جائے۔
وسیلیاں مطابق ایہ وی عالمی ادارے نے آکھیا اے کہ پی آئی اے، سٹیل ملز تے ہور قومی اداریاں توں چھٹکارا حاصل کیتا جائے۔ وسیلیاں نے ہور دسیا کہ آئی ایم ایف نے فنڈز نوں عیاشیاں وچ ضائع کرن دی بجائے بہتر استعمال دا وی آکھیا اے ۔ جی ایس ٹی دا گھیرا ودھان ، زراعت اُتے ٹیکس نافذ کرن، سبسڈیاں دے خاتمے دا نامکمل ایجنڈا پورا کرن دا وی آکھیا گیا اے۔
