لاہور( پاکستان پوائنٹ نیوز18۔جولائی۔2018ء ) مریم نواز دے پُتر جنید صفدر نوں سیاست وچ لیان تے فیر مسلم لیگ (ن) دا سربراہ بنائے جان دا امکان ظاہر کیتا جا رہیا اے۔ میڈیا رپورٹ مطابق شہباز شریف تے حمزہ شہباز دا پارٹی توں اثر ختم کرن لئی حسن تے حسین نواز نے وی اپنے بھانجے نوں سپورٹ کرنا شروع کر دتا اے۔ قومی اخبار وچ چھپن والی اک رپورٹ مطابق نواز شریف تے مریم نواز دے قریبی لوکاں دا مننا اے کہ 13جولائی نوں شہباز شریف نوں ریلی دی قیادت کردے ہوئے لاہور ائر پورٹ اپڑنا چاہیدا سی۔
نواز شریف تے مریم نواز نوں ایہ ڈر وی اے کہ اوہناں دے جیل وچ ہون دی وجہ توں پارٹی پالیسی اُتے شہباز شریف تے حمزہ شہباز سنے اوہناں دے ہم خیال لوکاں دا غلبہ ہو گیا اے،جیہدے توڑ لئی مریم نواز نے اپنے پُتر جنید صفدر نوں میدان وچ لاہ دتا اے۔لندن وچ موجود کُجھ وسیلیاں نے دسیا کہ برطانوی یونیورسٹی وچ پڑھدے جنید صفدر دیاں ستمبر تیکر چھٹیاں نیں ایس لئی پاکستان آ کے سیاست وچ ڈیبیو کرن نال اوہناں دی پڑھائی متاثر نہیں ہوئے گی۔
جنید صفدر اپنے دوویں مامیاں حسن تے حسین نواز نال صلاح مگروں پاکستان آئے نیں تے پاکستان آمد اُتے اوہناں نوں مریم نواز دے کیمپ دی حمایت وی حاصل اے۔ ایہو وجہ اے کہ جنید صفدر دی لاہور آمد اُتے لیگی کارکناں نے اوہناں دا چاہواں نال استقبال کیتا۔ لیگی رہنماواں دا خیال اے کہ الیکشن توں پہلاں نواز شریف تے مریم نواز نوں بُہتا ریلیف ملن دی کوئی آس نہیں اے، ایسے لئی جنید صفدر راہیں مہم چلان دا فیصلا کیتا گیا اے۔
