چیئرمین نیب دا عمران خان خلاف انکوائری دا حکم

عمران خان اُتے خیبرپختونخوا دے 2ہیلی کاپٹراں نوں ذاتی استعمال وچ لیان دا الزام اے

چیئرمین نیب دا عمران خان خلاف انکوائری دا حکم
 عمران خان اُتے خیبرپختونخوا دے 2ہیلی کاپٹراں نوں ذاتی استعمال وچ لیان دا الزام اے

پشاور( پاکستان پوائنٹ نیوز17۔جولائی۔2018ء ) چیئرمین نیب دا عمران خان خلاف انکوائری دا حکم، نیب نے عمران خان نوں کل سد لیا۔ عمران خان اُتے خیبرپختونخوا دے 2ہیلی کاپٹراں نوں ذاتی استعمال وچ لیان دا الزام اے۔ تفصیل مطابق نیب آجکل بہت متحرک ہو گئی اے۔ خاص کر جدوں توں جسٹس (ر) جاوید اقبال نے ایس ادارے نوں سنبھالیا اے، اودوں توں نیب نے کرپشن خلاف کئی کارروائیاں کیتیاں۔

اک پاسے شریف خاندان خلاف کیس تیزی نال انجام نوں اپڑ رہے نیں تے دوجے پاسے ہور کرپٹ سیاسی و سرکاری شخصیتاں خلاف تیزی نال کارروائیاں دا سلسلا وی جاری اے۔ ایس حوالے نال مسلم لیگ (ن) نیب توں ناراض وکھالی دیندی اے۔ ایون فیلڈ ریفرنس کیس وچ سزا سُنائے جان مگروں ہن احتساب عدالت دا دھیان دوجیاں پارٹیاں ول وی ہون لگا اے۔ سابق صدر آصف زرداری وی شکنجے وچ آ گئے نیں۔

بے نامی بنک اکاؤنٹس دے سلسلے وچ اوہناں دا ناں اک مقدمے وچ داخل کیتا گیا اے جدکہ ایس کیس دے ساہمنے آن مگروں اوہناں تے اوہناں دی بھین فریال تالپور دا ناں وی ای سی ایل وچ پادتا گیا اے ۔ تازہ اطلاع مطابق ہن نیب نے عمران خان نوں سرکاری ہیلی کاپٹر دے غیر قانونی استعمال اُتے 18جولائی نوں طلب کر لیا۔ نیب دی تفتیشی ٹیم ولوں جاری کیتا گیا نوٹس بنی گالا دے ملازماں نے وصول کر لیا اے۔

نوٹس وچ چیئرمین پی ٹی آئی عمران خان نوں ذاتی طور اُتے بیان ریکارڈ کروان لئی نیب پشاوردفتر سدیا گیا اے۔ نیب کے پی کے نے سرکاری ہیلی کاپٹر غیر قانونی استعمال کرن دے کیس وچ عمران خان خلاف ریکارڈ وی طلب کر لیا اے۔ نیب ولوں عمران خان نوں ذاتی طور اُتے بیان ریکارڈ کروان لئی نیب ہیڈ کوارٹر پشاور حاضر ہون دا حکم دتا گیا اے۔چیتے رہوے کہ 17مارچ نوں نیب پشاور نے پاکستان تحریک انصاف دے چیئرمین عمران خان خلاف سرکاری ہیلی کاپٹر دے غیر قانونی استعمال دے کیس وچ 5گواہواں دے بیان ریکارڈ کیتے سن۔