لاہور( پاکستان پوائنٹ نیوز17۔جولائی۔2018ء ) زعیم قادری نے شہباز شریف دا بھانڈا بھن دتا۔ زعیم قادری نے الزام لایا کہ شہباز شریف مسلم لیگ (ن)نوں نواز شریف توں وکھ کرنا چاہندے نیں تے ایہو وجہ اے کہ اوہ نواز شریف دے بیانیے توں اختلاف کردے نیں۔ تفصیل مطابق مسلم لیگ (ن) دے باغی رہنما زعیم قادری نے شہباز شریف اُتے سخت الزام لایا اے۔ زعیم قادری نے آکھیا کہ شہباز شریف مسلم لیگ (ن)نوں نواز شریف توں وکھ کرنا چاہندے نیں تے ایہو وجہ اے کہ اوہ نواز شریف دے بیانیے توں اختلاف کردے نیں۔
چیتے رہوے کہ ایس توں پہلاں آکھیا جا رہیا سی کہ شہباز شریف نے نواز شریف دے استقبال لئی 13جولائی نوں ائر پورٹ جان والی ریلی دا پروگرام دو دن پہلاں رد کر دتا سی تے13جولائی نوں مسلم لیگ (ن) دے سینئر رہنما خواجا آصف، پرویز رشید، خواجا سعد رفیق، مشاہد حسین سید تے مشاہد اللہ خان نوں وی فیصلے بارے دس دتا سی، جیہدے اُتے خواجا آصف، پرویز رشید تے مشاہد حسین نے فیصلا منن توں انکار کر دتا سی پر پارٹی قائد دے سخت فیصلے مگروں اوہناں نوں سِر نیویں کرنے پئے پر مشاہد اللہ خان نے شہباز شریف دے فیصلے نوں نہیں منیا تے اپنے کُجھ کارکناں نال قائد دے استقبال لئی ائر پورٹ اپڑے۔
دوجے پاسے شہباز شریف کئی رہنماواں نال ائر پورٹ توں 5کلو میٹر دور جوڑے پُل اُتے ہزاراں کارکناں نال کھلوتے رہے ۔ ایس توں وکھ اوہناں نوں آئی جی پنجاب کلیم امام نے وی ائر پورٹ اپڑن دی صورت وچ خطرے بارے دس دتا سی تے ریلی دوران شہباز شریف تے آئی جی پنجاب دا ٹیلی فونک رابطہ وی لگاتار ہوندا رہیا۔
