اسلام آباد( پاکستان پوائنٹ نیوز17۔جولائی۔2018ء ) پی ٹی آئی چیئرمین عمران خان دی دوجی سابقہ بیوی ریحام خان نے ویاہ توں پہلاں عمران خان نال ہوئی اک ملاقات دا دلچسپ قصہ سُنا دتا۔ ریحام خان نے اپنی کتاب وچ جتھے کئی انکشافات کیتے اوتھے اوہناں نے ایہ وی دسیا کہ عمران خان نے کیویں غیر معمولی تے نہ یقین جوگ انداز وچ مینوں ویاہ دی آفر کیتی۔اپنی کتاب وچ ریحام خان نے لکھیا کہ اک دن میں معمول دی ملاقات لئی بنی گالا گئی۔
ملاقات دوران عمران خان میریاں اکھاں وچ ویکھدے رہے ، اوہناں دے لگاتار ویکھن اُتے میں شرما کے دوجے پاسے ویکھن لگ گئی تے اوہناں نے دسیا کہ میرے پیراں اُتے مچھر لڑ رہے نیں۔ اگلے ای لمحے عمران خان دے ہتھ میرے گِٹیاں اُتے سن تے اوہناں نے ہولی ہولی میرے گِٹیاں نوں پھڑیا، جیویں میرے پیر مچھراں توں بچا رہے ہون، اوہناں اپنے ہتھاں نال مچھراں دے وڈھے نشاناں اُتے ہولی ہولی ہتھ پھیریا۔
عمران خان دی ایس حرکت اُتے میں اپنی کرسی توں اُچھل پئی، اوہ تھوڑا اگانہ جھکے جیویں چُمن لگے ہون، پر فیر اوہناں نے اک آہ بھری تے پچھانہ ہٹ گئے۔ ریحام خان نے اپنی کتاب وچ لکھیا کہ ایہ اوہ موقع سی جدوں عمران خان نے مینوں ویاہ دی آفر کیتی تے میں اوہناں نوں جواب دتا کہ کیہ تُسیں ہوش وچ او؟دوجے پاسے ریحام خان دے ایس قصے اُتے سوشل میڈیا ورتیندڑاں نے حیرانی دا وکھالا کیتا اے۔
