جلال پور بھٹیاں( پاکستان پوائنٹ نیوز16۔جولائی۔2018ء ) (ن) لیگی رہنما رانا ثنا اللہ نے جمعے دے دیہاڑے بیان دتا کہ نواز شریف دا استقبال حج توں وی وڈا کم اے، جیہدے اُتے اوہناں نوں ڈاڈھی تنقید دا نشانہ بنایا گیا۔ سوشل میڈیا ورتیندڑ اجے وی رانا ثنااللہ دے بیان نوں بھُلے نہیں سن کہ (ن) لیگی رہنما سائرہ افضل تارڑ نے وی اک جھیڑوا(متنازعہ) بیان دے دتا۔ جلال پور بھٹیاں وچ کارکناں نال خطاب کردے ہوئے سائرہ افضل تارڑ نے آکھیا کہ یقین منو اللہ تعالی تجربیاں توں سکھدا اے تے اسیں وی تجربیاں توں سکھنے آں۔ سائرہ افضل تارڑ دے ایس بیان اُتے اوہناں نوں ڈاڈھی تنقید دا ساہمنا کرنا پیا۔ سوشل میڈیا تے مذہبی رہنماواں ولوں ڈاڈھا ردعمل آن اُتے سائرہ افضل تارڑ نے میڈیا اُتے اک وضاحتی پیغام وی جاری کر دتا۔ اپنے پیغام وچ اوہناں دا کہنا سی کہ سوشل میڈیا اُتے میرے جس جملے تے گل نوں ہوا دتی جا رہی اے اوہدے توں میرا اوہ مقصد نہیں سی۔ کئی دفعہ انسان دے مونہوں کوئی اجیہا لفظ نکل جاندا اے جوکہ اوہدا مطلب نہیں ہوندا تے میں ایس جملے نوں دوہرانا نہیں چاہندی، نعوذ بااللہ ایہدے وچ میرا کوئی غلط مقصد نہیں سی، میں صرف ’سکھانے‘ دی بجائے ’سیکھنے‘ آکھ دتا۔اوہناں نے آکھیا کہ جو میں کہنا چاہندی سی اوہ ایہ سی کہ اللہ تعالی تجربیاں نال سکھاندا اے تے انسان تجربیاں توں ای سکھدا اے۔ اوہناں دا کہنا سی کہ کوئی وی بندہ جس وچ ذرا جِنی وی عقل تے ایمان اے اوہنوں پتا اے کہ میں کیہ کہنا چا رہی سی۔ مینوں دُکھ اے کہ میرے ایس جملے نوں سیاسی رنگ دتا جا رہیا ا ے۔ پی ٹی آئی تے میرے مخالف ایہنوں اُچھال رہے نیں۔ جدوں میرے خلاف کوئی ہور شے نہیں لبھی تے ایس شے نوں ہوا دتی جا رہی اے۔ سائرہ افضل تارڑ نے آکھیاکہ میں آپ قرآن دی طالبعلم آں تے اللہ رب العزت دی جو ذات اے تے جو قدرت و وحدانیت اے اوہ میرے توں بہتر کوئی نہیں جان سکدا۔ میں اپنے مخالفاں تے اوہناں لوکاں نوں جو ایس طرحاں دیاں شیواں اُتے کمنٹ کردے نیں، ایہو آکھاں گی کہ ایہ اک بڑا حساس معاملا اے تے ایہ ساڈے ایمان دا حصہ اے۔ جو غلط گل میرے مونہوں نکلی میں اوہدے لئی معذرت خواہ آں تے میں سبھ نوں آکھاں گی کہ خدا لئی ایس گل نوں نہ اُچھالو۔
ویڈیو ویکھو:
