لاہور( پاکستان پوائنٹ نیوز16۔جولائی۔2018ء ) پی ٹی آئی چیئرمین عمران خان نے پچھلے ہفتے سابق وزیر اعظم نواز شریف دے استقبال لئی لاہور ائر پورٹ جان والے لیگی کارکناں نوں ’گدھا‘ آکھیا جیہدے اُتے لیگی رہنماواں تے کارکناں نے عمران خان نوں ڈاڈھی تنقید دا نشانہ بنایا۔ پر ہن سوشل میڈیا اُتے سردار ایازق صادق دی وی اک ویڈیو وائرل ہو رہی اے۔ ویڈیو وچ ویکھیا گیا کہ (ن) لیگی رہنما و سابق سپیکر قومی اسمبلی سردار ایاز صادق نے کارکناں نال خطاب کردے ہوئے آکھیا کہ میری گل سُنو!جو پنجابی عمران خان یاں پی ٹی آئی نوں ووٹ دیوے گا اوہ بے غیرت ہوئے گا، اسیں باغیرت آں تے اسیں ثابت کراں گے کہ اسیں باغیرت لوک آں۔ ایس ویڈیو وچ سردار ایاز صادق نے عمران خان نوں مخاطب کرد ے ہوئے آکھیا کہ عمران خان کس مونہ نال ووٹ لین گے؟ہن جو لوک وی تہاڈے نال نیں اوہ بے غیرت نیں۔
دوجے پاسے ویڈیو وائرل ہوندے ای سوشل میڈیا ورتیندڑاں نے ایاز صادق نوں تنقید دا نشانہ بنایا اے۔ سوشل میڈیا ورتیندڑاں دا کہنا سی کہ رہنماواں نے اپنی اپنی انتخابی مہم شروع کیتی ہوئی اے تے کارکناں نال خطاب وچ اک دوجے اُتے لفظی حملے وی کیتے جا رہے نیں پر ایس لفظی جنگ وچ صرف لوکائی نوں ذلیل کیتا جا رہیا اے۔ عمران خان نے سابق وزیراعظم نواز شریف دا استقبال کرن لئی ائر پورٹ جان والے لیگی کارکناں نوں ’گدھا‘ آکھیا تے ایاز صادق نے عمران خان یاں اوہناں دا ساتھ دین والیاں نوں بے غیرت آکھ دتا۔
