اسلام آباد( پاکستان پوائنٹ نیوز16۔جولائی۔2018ء ) پی ٹی آئی چیئرمین عمران خان دی دوجی سابقہ بیوی ریحام خان نے اپنی کتاب وچ عمران خان دے روحانی مشیراں بارے وی ذکر کیتااے ۔ کتاب وچ ریحام نے لکھیا کہ 2014وچ عون چودھری نے اک نویں خاتون پیرنی نوں عمران خان نال ملوایا۔ ایہ اطاعت عمران خان نوں مخول پُنے دی اک نویں اُچیائی ول لیجائے گی۔ اوہناں نے انکشاف کیتا کہ عمران خان دی ایہ اطاعت صرف کالے جادو تے تعویز اُتے نہیں رُکی۔
اوہناں نے لکھیا کہ میرے شوہر ایس طرحاں دیاں کئی حیران کن شیواں اُتے یقین رکھدے نیں جو کسے منطق یاں انسانی سوچ توں بالاتر نیں۔ اگست وچ ووڈو دے آثار ہر تھاں موجود سن، مینوں بنی گالا دے محافظاں نے دسیا کہ عالمہ دے شوہر ایتھے آئے تے اوہناں نے فرنٹ ڈور نیڑے موجود پُھلاں دے گملیاں وچ تعویز دبے، ایس طرحاں مجھاں دی ویکھ بھال کرن والے بندے دے کمرے وچ موجود گملیاں وچ عجیب شیواں پکائیاں گئیاں۔
ریحام خان نے لکھیا کہ اوس ویلے میرے ذہن نے تے کم کرنا بند کر دتا۔ کالی دال، روحانی مشیراں، جادوئی تعویز؟میں اپنے آپ نوں آکھیاکہ میں آخر کسے جہنم وچ اپنے آپ نوں لے آئی آں۔ چیتے رہوے کہ ریحام خان نے اپنی کتاب وچ ہن تیکر کئی ہلا دین والے انکشافات کیتے نیں۔ ریحام خان نے ایس کتاب وچ اپنے دوویں ویاہواں دی ناکامی خاص کر عمران خان دی زندگی تے اوہناں نال رہن دوران ساہمنے آن والیاں شیواں دا ذکر کیتا اے۔
