لاہور( پاکستان پوائنٹ نیوز14۔جولائی۔2018ء ) امیر جماعت اسلامی سراج الحق دی انتخابی ریلی اُتے نامعلوم بندیاں نے حملا کر دتا، نامعلوم ملزماں دی فائرنگ تے وٹے مارن دے نتیجے وچ جماعت اسلامی دے 5کارکن زخمی ہو گئے جدکہ سراج الحق دی گڈی نوں نقصان اپڑیا، سراج الحق حملے وچ محفوظ رہے۔ سیکرٹری اطلاعات جماعت اسلامی پاکستان قیصر شریف دا کہنا اے کہ جماعت اسلامی یوتھ دی ریلی منڈا دیر توں تیمر گرہ ول جا رہی سی۔
انتخابی ریلی دی قیادت سراج الحق کر رہے سن۔ ریلی جدوں منڈا دیر نیڑے اپڑی تے نامعلوم بندیاں نے پہلے وٹے مارے تے بعدوں فائرنگ کر دتی۔ جیہدے نتیجے وچ سراج الحق دی گڈی نوں نقصان اپڑیا پر امیر جماعت اسلامی سینیٹر سراج الحق تے کارکن محفوظ رہے پر وٹے وجن نال جماعت اسلامی دی ریلی وچ موجود 5بندے زخمی ہو گئے۔قیصر شریف دا کہنا سی کہ جماعت اسلامی دے رہنما اعزاز الملک افکاری نے واقعے دے فوری مگروں پولیس تے انتظامیہ نوں دس دتا۔
واقعے دی ایف آئی آر درج کروادتی گئی۔ نگران حکومت توں منگ اے کہ چھیتی نوٹس لئے۔ سیکرٹری اطلاعات جماعت اسلامی قیصر شریف نے امیر جماعت اسلامی سینیٹر سراج الحق دی ریلی اُتے فائرنگ دی مذمت وی کیتی ۔ اوہناں نے آکھیا کہ اے این پی دے صوبائی امیدوار بہادر خان دی حویلی وچوں پہلاں وٹے مارے گئے ، جیہدے مگروں فیر فائرنگ کیتی گئی۔
