لاہور( پاکستان پوائنٹ نیوز14۔جولائی۔2018ء ) پاکستان مسلم لیگ (ن) نے امیدواراں نوں ا نتخابی مہم ہور تیز کرن، کارکناں تے سپوٹراں نوں 25جولائی نوں گھروں کڈھن لئی بھرپور حکمت عملی بنان لئی سرگرمیاں کرن دی ہدایت کر دتی جدکہ مسلم لیگ (ن) دے قائد میاں نواز شریف نوں احتساب عدالت ولوں دتی جان والی سزا خلاف ہر فورم اُتے قانونی جنگ لڑن دے عزم دا وی اعادہ کیتا گیا۔
تفصیل مطابق مسلم لیگ (ن) دے مرکزی صدر محمد شہباز شریف دی صدارت ہیٹھ اوہناں دے گھر 96ایچ ماڈل ٹاؤن وچ پارٹی دے مرکزی رہنماواں دا اعلا سطحی اجلاس ہویا۔ اجلاس وچ وزیر اعظم آزاد کشمیر راجا فاروق حیدر، سابق وزیر اعظم شاہد خاقان عباسی، سردار ایاز صادق، خواجا سعد رفیق، احسن اقبال، امیر مقام، مشاہد اللہ خان، سلیم ضیا، مشاہد حسین سید، مریم اورنگزیب، رانا تنویر حسین، وزیر اعلا گلگت بلتستان حافظ حفیظ الرحمان رلتی ہوئے۔
اجلاس وچ دہشت گردی دے ہون والے واقعیاں د ی نندیا(مذمت) کردے ہوئے شہید ہون والیاں دی روح دے ایصال ثواب لئی فاتحہ خوانی کیتی گئی۔ اجلاس دے رلتیاں نے مسلم لیگ (ن) دے قائد میاں نواز شریف دے استقبال لئی کڈھی گئی ریلی اُتے اطمینان دا اظہار کیتا تے ایس جذبے نوں 25جولائی تیکر برقرار رکھن دے عزم دا اعادہ کیتا۔ شہباز شریف دا کہنا سی کہ سارے امیدوارا نتخابی مہم ہور تیز کرن۔
کارکناں تے سپوٹراں نوں 25جولائی نوں گھروں کڈھن دی حکمت عملی بنان لئی سرگرمیاں کیتیاں جان۔اوہناں دا کہنا سی کہ مسلم لیگ (ن) نے 13جولائی دا معرکہ اپنے ناں کیتا ہن 25جولائی نوں الیکشن جِتنا اے تے ایہدے لئی ہر بندے نوں اپنا انفرادی تے اجتماعی کردار نبھانا پئے گا۔وسیلیاں مطابق اجلاس وچ مسلم لیگ (ن) دے قائد نواز شریف تے اوہناں دی دھی مریم نواز دی ملک واپسی تے گرفتاری دے حوالے نال وی گل بات کیتی گئی تے فیصلا کیتا گیا کہ غیر منصفانہ فیصلے خلاف ہر پدھر(سطح) اُتے قانونی جنگ لڑاں گے۔ اجلاس وچ نگران حکومت دے حوالے نال وی گل بات کیتی گئی۔
